Nun relatorio impartido polo investigador do Hospital Barretos de Cáncer de São Paulo
Persoal investigador do Cinbio achégase ao traballo do científico Rui Manuel Reis no tratamento e diagnose do cancro
A abeiro do ciclo Cinbio Seminar Programme, persoal investigador do Centro de Investigacións Biomédicas da UVigo achegouse hoxe ao traballo que o científico Rui Manuel Reis desenvolve no Hospital Barretos de Cáncer de São Paulo, Brasil, no tratamento e diagnose do cancro, con accións como unidades móbiles de prevención da enfermidade.
No seu relatorio vía Zoom, titulado Biomarkers in cancer: from prevention to therapy decision, o investigador afondou na importancia da prevención cunha diagnose temperá da enfermidade. “O futuro do cancro de pulmón está nas biopsias non invasivas, como sangue ou esputo. A mellor oportunidade que temos é detectar o cancro de pulmón no primeiro ou no segundo estadío”, dixo Reis. O obxectivo principal da súa investigación é conseguir caracterizar as principais alteracións xenómicas do hóspede e o seu microbioma arredor dos tumores para traducilo en coñecemento e beneficio clínico a través do uso de biomarcadores.
Finalizado o relatorio, o investigador sinalou a posibilidade dunha futura colaboración co Cinbio, tendo en conta a similitude das liñas de investigación do centro coas súas propias. A charla foi moi participativa e o persoal de varios grupos de investigación trasladoulle varias cuestións e comentarios ao investigador relativas a esas liñas de traballo compartidas.