Como traballo para unha materia dos graos en Educación Infantil e Educación Primaria
Preto de 50 estudantes participan en Ribeira nunha xornada de actividades deseñadas polo propio alumnado
Englobou unha serie de propostas centradas no ODS
Preto de 50 estudantes da Facultade de Ciencias da Educación e do Deporte viviron este luns unha intensa xornada de actividades no municipio de Ribeira, nunha iniciativa que implicaba a posta en práctica dun proxecto educativo que un grupo de oito alumnas e alumnos dos graos en Educación Infantil e Educación Primaria deseñaron como traballo para a materia Coñecemento da contorna. Como explica o seu docente, Roberto Silva, o obxectivo desta iniciativa era promover que o alumnado leve a cabo proxectos educativos centrados “no aproveitamento da contorna dunha maneira activa e saudable” e que á súa vez sirvan para concienciar sobre a importancia do Obxectivos de Desenvolvemento Sostible (ODS).
“Son eles os que elixen o destino, falan cos centros aos que imos ir, deseñan as actividades...”, salienta Silva dunha iniciativa que propón “facer unha aula fóra de calquera edificio”. Nese senso, o proxecto deseñado por este grupo de estudantes levou aos seus compañeiros e compañeiras a visitar o faro de Corrubedo, para logo percorrer o camiño litoral que leva desde este edificio ata a vila e coñecer “diversos sendeiros e recursos arqueolóxicos do Parque Natural”. Organizada polas estudantes de Educación Infantil Zaira Díaz, Andrea Ledicia García, María Fernández e María Figueroa, xunto coas alumnas de Educación Primaria María Pérez-Ardá, Ana Vázquez, Estefanía Rívas e o alumno Pablo Lago, a xornada comprendeu tamén unha actividade de recollida selectiva de residuos na praia do Vilar. Por último, a xornada completouse cunha visita guiada á lonxa de Ribeira e cunha actividade de “mapping paisaxístico”, tomando como referencias o Castro da Cidá e o mirador da Pedra da Rá.