DUVI

Diario da Universidade de Vigo

Nono Bandera será un dos 37 artistas presentes no evento que arranca este xoves en Madrid

Un profesor de Belas Artes participará na primeira feira de arte contemporánea e cerámica de España 

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Pontevedra
  • Arte
  • Cultura
  • Cultura
DUVI Pontevedra 05/06/2024

Desde este xoves 6 de xuño, o Palacio de Santa Bárbara en Madrid acollerá cerARTmic, a primeira feira de arte contemporánea e cerámica de España, na que poderán contemplarse as creacións que unha serie de artistas plásticos desenvolveron exclusivamente con técnicas cerámicas. Entre elas, atópanse as obras do artista e profesor da Facultade de Belas Artes Nono Bandera, un dos 37 seleccionados e seleccionadas para un evento centrado no traballo coa cerámica cunha “visión totalmente actual e contemporánea”, como sinalan desde a organización. Na feira participan 15 galerías nacionais e internacionais, que “exporán obras dos principais artistas contemporáneos que usan como medio de expresión a cerámica”, destacou a organización.

“A idea desta feira é mostrar a cerámica desde posicións disciplinares propias da arte contemporánea, desde a pintura, como é o meu caso, ou desde a escultura e a instalación”, salienta Bandera. De aí que ademais de incidir en que “participar nunha feira de arte contemporánea dá moita visibilidade ao teu traballo”, destaque tamén o interese que supón o formato deste evento, que reúne creacións de artistas que “achegan unha visión revitalizadora ao que tradicionalmente se entendía como un oficio artesanal”, mais que a súa vez constitúe unha disciplina que permite a “apertura a novas posibilidades expresivas” e que abrangue unha “variedade enorme de técnicas”, como lembra o tamén director do Departamento de Debuxo da UVigo. 

Nesta feira, na que tamén se exhibirá o traballo da egresada da facultade Mar Ramón Soriano, poderán verse pezas que forman parte da serie Entre el caos y tus párpados, na que Bandera emprega o “tradicional azulexo” para compor “obras murais que se mostran como paneis cerámicos”. Como explica o artista e docente, esta serie inspírase nuns relatos de ficción do poeta dominicano Frank Báez, co que xa colaborara previamente. Os bocexos xurdidos da súa lectura remataron dando lugar a paneis de azulexos nos que emprega cores monocromas, “nun exercicio minimalista, traducindo cada imaxe a un sinxelo trazo de puntos, liñas e tramas”, apunta.