Profesorado de Polonia fórmase no campus nas aplicacións da intelixencia artificial para o ensino do dereito

Ao abeiro dun programa financiado pola Unión Europea, un grupo de docentes da Universidade Católica de Lublin fórmanse nestes días na Facultade de Dirección e Xestión Pública nas aplicacións da intelixencia artificial no ensino do dereito. Fano nas Xornadas internacionais sobre o impacto da IA na práctica docente e investigadora, coordinadas pola profesora Soraya Rodríguez e promovidas co apoio do Consello Social da UVigo. Este seminario pon o foco nas posibilidades que as ferramentas de intelixencia artificial xerativa poden supor no labor docente e investigador no ámbito xurídico, así como na transferencia de coñecemento. 

O xerme desta iniciativa, lembra Rodríguez Losada, foi a participación o pasado curso de docentes de Dirección e Xestión Pública nun BIP, un programa de mobilidade de curta duración, na John Paul II Catholic University de Lublin. O profesorado desta institución amosou o seu interese por obter “formación específica sobre o uso da IA” no ámbito do dereito, o que levou á sinatura dun convenio de colaboración coa UVigo para o desenvolvemento deste “proxecto piloto formativo”, explica a docente, que incide en que esta iniciativa permite tamén explorar as necesidades e demandas neste eido de profesorado de diferentes universidades. 

Formación teórica e práctica

Partindo do seu propio traballo no “deseño de prompts que puideran ser útiles para a docencia universitaria en materias xurídicas”, así como para a súa investigación na área do dereito financeiro e tributario, Rodríguez coordina un “seminario teórico-práctico” que combina relatorios e talleres con mesas redondas dirixidas á posta en común das cuestións abordadas. 

A actividade botou a andar o luns cunha xornada sobre o uso da intelixencia artificial na docencia, na que a profesora da UVigo abordou as súas posibilidades para o deseño de materiais, exames ou casos prácticos, para logo promover un taller sobre o deseño de tarefas con estas ferramentas, a “detección do copia e pega” e o seu uso na avaliación dos coñecementos do alumnado. A segunda xornada puxo o foco nos ámbitos da investigación e da transferencia, abordando cuestións como as súas posibilidades para o “mapeamento avanzado de literatura e síntese científica” e as súas posibilidades para “achegar lexislación complexa á cidadanía”. Esta xornada completouse cun taller de deseño de presentacións para congresos e outro centrado na transformación de textos xurídicos en “resumos accesibles”, infografías ou materias visuais.

As xornadas complétanse este mércores cunha sesión centrada no uso destas ferramentas para o “aforro de tempo”, na que se abordan cuestións como a súa aplicación en “fluxos de correo, dúbidas de alumnos e administración diaria”. 

A estas xornadas formativas sumouse unha xuntanza do profesorado da John Paul II Catholic University de Lublin co decano de Dirección e Xestión Pública, Fernando Martínez, e a videcana Sara Torres, dirixido a avaliar novas vías de colaboración.

Un campo no que continuar traballando

Como apunta Rodríguez, esta actividade constitúe un “proxecto piloto”, no que comezar a definir “unha folla de ruta” que permita traballar, xunto a diferentes socios, en accións formativas máis amplas neste eido. Con esa idea, cada xornada completábase cunha mesa redonda dirixida “a pór en común as nosas necesidades e como podemos implantar isto nas nosas universidades”, explica. Con ese propósito, estes debates sumaron ao profesorado polaco a participación por videoconferencia de docentes das universidades de Debrecen (Hungría) e Cagliari (Italia).