O proxecto arqueolóxico de Armea cumpre unha década

Este ano 2021 celébrase unha década do proxecto arqueolóxico de Armea, nado en 2011 no marco da colaboración entre o Grupo de Estudos de Arqueoloxía, Antigüidade e Territorio da Universidade de Vigo (GEAAT) e o Concello de Allariz, onde se sitúa o xacemento. Co gallo deste aniversario, desenvolverase un amplo abano de actividades que, seguindo a mesma filosofía da iniciativa, “buscan a interacción cos diferentes sectores da contorna e así achegar o proxecto á cidadanía”. Este venres presentouse a primeira das súas accións, a exposición Armea, a visión dos artistas locais.

“O Concello de Allariz e Universidade de Vigo camiñan neste 2021 cara a celebración do X aniversario do proxecto arqueolóxico de Armea, nado en 2011 e que de forma ininterrompida chega a unha década de traballos e a consecución dos obxectivos planeados nun inicio”, explican en nota de prensa desde o órgano municipal allaricense. As acción previstas de celebración, detallan, buscan divulgar o proxecto e o patrimonio como ferramenta para o desenvolvemento rural do territorio.

Unha ollada desde a arte

A programación arrancou este venres na Paneira, en Allariz, coa presentación da mostra Armea, a visión dos artistas locais, onde preto dunha vintena de creadores deste concello amosan a súa visión da Cibdá de Armea e a súa contorna. “Os artistas e artesáns colaboran coa posta en marcha desta exposición onde queda reflexada a visión que eles teñen do xacemento. Obras de diferentes disciplinas artísticas como son a pintura, a escultura, o gravado e a fotografía. Unha óptica diferente, tantas visións coma artistas para pór en valor a beleza plástica do xacemento e a súa contorna”, sinalan os promotores da inicaitiva sobre ela. Dentro desta exposición está tamén María Lázuli, orfebre de Allariz, que reproduciu unha caixa de selo atopada no xacemento e realizou distintas pezas de xoiería que tamén se poderán ver dentro desta mostra, que estará aberta ata o 25 de xullo.   

Na súa presentación, Cristina Cid, alcaldesa de Allariz, agradeceu a colaboración e apoio de todos eles “para facer que esta exposición sexa o arranque dun verán cheo de actividades para celebrar estes dez anos e para achegar o proxecto a toda á cidadanía”. Tamén agradeceu a implicación da Universidade de Vigo e do director das escavacións, Adolfo Fernández, por apostar por este proxecto dende os inicios. Pola súa banda Adolfo Fernández, vicedecano da Facultade de Historia do campus de Ourense e director do proxecto arqueolóxico de Armea, “valorou a importancia deste tipo de actividades para que todos e todas poidamos coñecer o noso patrimonio dunha forma diferente e atractiva e poidamos achegarnos así a toda a riqueza que ten a Cibdá de Armea”.

Máis actividades

Outra das actividades programadas para a celebración do X aniversario do proxecto Armea que permanecerá durante todo o verán aberta ao público será unha exposición en forma de lonas repartidas polo casco histórico de Allariz, na que se darán a coñecer os traballos realizados no xacemento ao longo desta década de escavacións. Esta exposición de rúa arrancará a vindeira semana. Por outra banda, indican desde o Concello de Allariz, tamén se editou un Roteiro Arqueolóxico Etnográfico de Armea e Santa Mariña de Augas Santas en formato papel e electrónico e no que se realiza unha explicación dos puntos máis representativos do percorrido. Dentro do folleto editado do roteiro atópase un código QR que permite realizar a ruta virtual marcada para facilitar o paseo por Armea e Santa Mariña de Augas Santas. Xa no mes de outubro celebraranse unhas xornadas divulgativas organizadas entre o Concello de Allariz e a Facultade de Historia do campus de Ourense.

A principios do mes de xullo está previsto que comece a tempada 2021 de escavacións arqueolóxicas no xacemento. O GEAAT volverá a intervir un verán máis na cibdá galaico-romana de Armea, na parroquia de Santa Mariña de Augas Santas, no marco do convenio de colaboración existente entre a institución académica e o Concello de Allariz. A campaña arqueolóxica desenvolverase durante todo o mes de xullo e nesta ocasión o obxectivo será ampliar a zona de escavación cara o leste. A Cibdá de Armea, lembran desde o grupo de investigación, está considerada “un referente para a arqueoloxía galega e peninsular”. Trátase, indican, dun xacemento único de orixe romana ocupado ex novo arredor do século I despois de Cristo e abandonado no III. As intervencións anuais realizadas no castro apuntan a que este enclave foi “unha auténtica cidade romana”, rica e de prestixio segundo os restos atopados ata o momento, que suporía despois da cidade de Lugo o principal tecido urbano de época romana de Galicia. Os traballos levados a cabo en cada campaña son financiados polo Concello de Allariz, contando o pasado ano por primeira vez co apoio económico da Xunta de Galicia, da Dirección Xeral de Patrimonio.