DUVI

Diario da Universidade de Vigo

A biblioteca do campus acolle unha mostra de publicacións sobre estas temáticas

Un recuncho para coñecer libros sobre igualdade e feminismo

Co gallo da celebración este mércores do Día Internacional da Muller

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Igualdade
  • Institucional
DUVI Ourense 08/03/2023

Co obxectivo de valorizar os seus fondos e de fomentar a lectura, periodicamente a Biblioteca Rosalía de Castro do campus de Ourense habilita recunchos nos que pon a disposición das e dos seus usuarios libros e outros recursos arredor dunha temática concreta. Coincidindo coa celebración este 8 de marzo do Día Internacional da Muller, o centro dispuxo unha pequena mostra na súa entrada na que amosa diferentes publicacións relacionadas coa igualdade e a desigualdade de xénero, dedicando especial atención á historia e ás correntes do movemento feminista.

A selección de fondos, realizada polas técnicas da biblioteca, é moi diversa en autorías, xéneros e enfoques, abranguendo títulos como El lunes nos querrán, de Najat El Hachmi; No es lugar para mujeres, de Wendy Moore; Quemar el miedo, de Lastesis Colectivo; Eu son Exeria, de Marisa Vidal; Lectura fácil, de Cristina Morales; Senlleiras, de Antía Yáñez; Malas mujeres, de María Hesse; Manual para incendiar el paraíso, de María Murnau; Feminismo en cen palabras, de Luca Chao, ou Insumisas, de Laura Manzanera. Os exemplares están a disposición das persoas usuarias do centro para a súa consulta en sala ou préstamo. A mostra rematará o 16 de marzo.