Reigosa recibe ao seu homólogo da universidade albanesa de Shkodra na procura de novas liñas de colaboración

Co obxectivo de ampliar os lazos de colaboración e procurar novos proxectos nos que participen ambas as dúas institucións, o reitor da Universidade de Vigo, Manuel Reigosa, mantivo un encontro nas últimas horas co seu homólogo da Universidade de Shkodra (Albania), Adem Bekteshi. O reitor albanés participou desde o pasado luns e ata hoxe na Semana Formativa Internacional Academia de Excelencia Balcáns-Universidade de Vigo, que se celebrou na institución académica viguesa e na que tomaron parte 60 docentes de universidades de Albania, Serbia, Bosnia e Hercegovina e Montenegro.

Ao longo dos cinco días do encontro as e os participantes coñeceron as estratexias de internacionalización e proxectos de cooperación educativa que desenvolve a Universidade de Vigo, que dende hai catro anos colabora con varias universidades dos Balcáns, a través de proxectos europeos de mobilidade e de construción de capacidades. Organizada en sete paneis temáticos, aos que se engadiu un curso intensivo de introdución ao español, esta xornada formativa entre docentes e persoal procedente dos Balcáns e local, permitiu intercambiar ideas e boas prácticas, así como fomentar a implementación de novos proxectos de cooperación educativa internacional. 

Neste intre, a relación entre Vigo e as institucións académicas dos Balcáns, materialízase en tres proxectos, dous de mobilidade, nos que a Universidade de Vigo é coordinadora (Erasmus Mundus Green Tech WB Proyect e Erasmus + KA107 Project With The Western Balcans, que prevé preto de 100 mobilidades) e un terceiro de construción de capacidades (Erasmus+ KA2 Capacity Building).