Representantes de sete universidades afondan no papel da virtualidade no ensino superior

Reunir unha serie de “actores con experiencia en proxectos e-learning” de diferentes universidades españolas para analizar diferentes experiencias de implantación de modalidades virtuais no ensino superior, así como para darlles a coñecer o traballo levado a cabo neste eido polo Grao en Dirección e Xestión Pública e o Máster en Dirección Publica e Liderado Institucional. Estes eran os dous obxectivos da primeira xornada Docencia virtual universitaria, que a Facultade de Dirección e Xestión Publica promove na tarde deste xoves a través de Campus Remoto e que reúne no seu programa as intervencións de docentes e representantes das universidades de Burgos, Oviedo, Zaragoza e Rey Juan Carlos, da UNED e da UOC, ademais da propia UVigo.

O reitor, Manuel Reigosa, e o decano comisario, Enrique Varela, foron os encargados de inaugurar esta xornada virtual que, a través de tres mesas de debate, afonda no traxectoria e labor de universidades públicas a distancia, nas experiencias na modalidade online de institucións presenciais e no caso concreto dos estudos virtuais xa implantados no eido xestión pública. Do mesmo xeito, a xornada tamén puxo o foco nos efectos que a covid-19 tivo no ensino universitario, ao que “as modalidades virtuais e semipresenciais chegaron para quedarse en tempos pospandemia”, sostivo Varela, para quen “parece seguro” que, tras a experiencia do Grao en Dirección e Xestión Pública, que o pasado curso se converteu no primeiro de Galicia en implantar unha modalidade virtual, “virán outras noutros campos do ensino superior”. Nesa mesma liña, tamén o reitor puxo de relevo que unha das aprendizaxes da pandemia "é que incluso as universidades claramente presenciais imos ter que facer uso destas ferramentas" que, como sinalou Reigosa, poden contribuír "a prestar un mellor servizo á cidadanía e a ter máis éxito na captación de alumnado".

Tres mesas de análise

O primeiro destes coloquios contou coa participación de Jorge Vega, director do Centro Tecnolóxico Intecca da UNED, e de Mildred Guinart, directora do Grupo de Xeración e Transferencia de Coñecemento eLearn Center da Universitat Oberta de Catalunya (UOC). A segunda mesa sumou ao debate as achegas da profesora da Rey Juan Carlos Isabel Bagaza, do director do Centro de Ensinanza Virtual da Universidad de Burgos, Víctor Abella, e do propio Varela. Por último, o terceiro dos coloquios permitiu afondar na implantación de modalidades virtuais nos graos de Xestión e Administración Pública das universidades de Zaragoza e Oviedo, da man dos seus coordinadores, Nuria Domeque e Ignacio Fernández, así como na propia experiencia do Grao en Dirección e Xestión Publica e do máster online en Dirección Pública e Liderado Institucional. Fíxoo a través das intervencións de Mónica López Viso, secretaria académica do mestrado, e Xosé Mahou, responsable de virtualización de títulos da Facultade de Dirección e Xestión Pública, que organizou esta foro de debate xunto co Observatorio da Gobernanza G3 e o grupo de innovación Docencia aberta_Open Teaching.