DUVI

Diario da Universidade de Vigo

Ao longo da xornada teñen lugar concertos, un mercadiño ou diferentes concursos

San Ero enche Belas Artes de actividades

Promovidas por unha asemblea de estudantes

Etiquetas
  • Estudantes
  • Medios
  • PAS
  • PDI
  • Pontevedra
DUVI Pontevedra 16/05/2018

A Facultade de Belas Artes vive este mércores unha longa xornada de actividades e celebración con motivo do día do seu patrón, San Ero, para o que unha asemblea de estudantes do centro promoveu unha serie de iniciativas como un mercadiño, concertos ou un concurso de poesía. Baixo o lema de San Ero Apocalíptico, un grupo de preto de 40 alumnos e alumnas deseñou un programa de actividades “co que quixemos distanciarnos da idea do botellón e promover máis a cultura, buscando tamén que a cidade nos vexa como algo positivo”, sinalan os organizadores dunha xornada que arrincou cun mercadiño dirixido “a exhibir os traballos do alumnado” e no que se podían atopar tanto láminas, cómics ou fanzines como camisetas e chapas en homenaxe a Manuel Moldes, falecido o pasado mes de decembro, que tiñan como propósito sufragar os custos da instalación dun retrato do artista e profesor, realizado polo ilustrador Kiko Da Silva, na cafetería do centro. 

As actuacións no patio da facultade de Pazifestas, Mind Warp, La Nona Hora, Ignacio Rivoira, Miguel Alberte e Hidden Rapouso, xunto cos dj Jota e Charlito Kitkat, enchen desde este mediodía de música unha celebración que alberga tamén concurso de poesías e de reciclaxe, unha competición de tenis de mesa ou unha “xincana apocalíptica”. Así mesmo, a celebración complétase co desfile polas rúas de Pontevedra, tanto a mediodía como pola tarde, da ‘imaxe’ do patrón, que construíuse desta volta a partires “das ofrendas cibernético-apocalípticas que fomos pedindo ao alumnado”, explican desde a organización do evento,  para o que se seleccionou como cartel anunciador a proposta dun San Ero Apocalíptico que, “nun ano de cambios” achégase “como unha broma á metáfora do ave fénix que rexurde das súas cinsas”.