Un seminario afonda en casos de éxito de cidades termais

A Facultade de Ciencias Empresariais e Turismo do campus de Ourense celebrou este venres o seminario As cidades termais desde a perspectiva do desenvolvemento endóxeno. Concretamente, a cita centrouse na análise dos casos de éxito de Bath, en Reino Unido, e Chaves, en Portugal, contando con especialistas de ambas cidades termais.

A actividade foi presentada por Mª Monserrat Cruz, decana da Facultade de Ciencias Empresariais e Turismo, que destacou a pertinencia da celebración desta cita coincidindo co desenvolvemento estes días da feira termal Termatalia e subliñou a importancia de “pór a Ourense no panorama internacional do termalismo” con este tipo de accións. Pola súa banda, José Ángel Vázquez Barquero, profesor da facultade e coordinador da actividade, subliñou pola súa banda a importancia de abordar o termalismo desde o punto de vista do desenvolvemento económico, fixando neste caso a atención nos exemplos das cidades de Bath e Chaves. Igualmente, destacou a relevancia do proxecto de especialización do campus de Ourense como Campus Auga.  

O programa

A xornada arrancou cunha conferencia titulada As fontes do desenvolvemento endóxeno, presentada polo catedrático da UVigo Marcos Álvarez e ofrecida por Antonio Vázquez Barquero, catedrático de Economía e profesor emérito da Universidad Autónoma de Madrid. Na súa intervención, o experto falou do “paso do fundamentalismo do mercado ao desenvolvemento endóxeno e das políticas rexionais e industriais ás políticas dos territorios; dunha visión máis teórica e abstracta a outra asociada cos territorios onde os protagonistas son os actores locais”.

Seguiulle unha mesa de análise do caso da cidade termal lusa de Chaves, presentada por Manuel Pérez Cota, director de Innovación Administrativa da Universidade de Vigo, e que tivo como relatores a Maria José Alves, directora executiva do Laboratorio Colaborativo AquaValor, e Ramiro Manuel Moreira Gonçalves, primer secretario executivo da Comunidade Intermunicipal do Alto Tamega e tamén director executivo do Laboratorio Colaborativo AquaValor. Unha segunda mesa centrouse na análise do caso da cidade termal de Bath, en Reino Unido. Neste caso foi presentada por Mario Crecente Maseda, presidente del Comité Científico da European Historic Thermal Towns Association (EHTTA), e contou coas intervencións de Paul Simons, secretario xeral de The Great Spa Towns of Europe Association, e representante institucionais de Bath.