Un seminario afonda nos recursos termais e xeotérmicos de Galicia desde a perspectiva xurídica

Baixo o título Os recursos termais e xeotérmicos de Galicia desde a perspectiva xurídica, a Facultade de Dereito do campus de Ourense acolleu este xoves un seminario que reuniu especialistas de referencia para analizar os réximes de xestión destes recursos. A actividade estivo organizada por Ágora Termal, foro de debate e divulgación científica sobre o termalismo con sede no campus de Ourense e no que participa un amplo colectivo investigador da Universidade de Vigo.

O seminario, que contou coa colaboración da Facultade de Dereito, estivo financiado polo Campus Auga, o proxecto de especialización do campus de Ourense acreditado e financiado pola Consellería de Educación, Ciencia, Universidades e Formación Profesional da Xunta de Galicia. Dirixido por Sofía Salgado e con secretaría de Marta Vázquez, o evento foi inaugurado pola decana da citada facultade, Susana Álvarez. 

Dúas mesas redondas

O seminario estivo concibido como un espazo de análise e debate arredor da lexislación aplicable en Galicia. Durante a mañá celebráronse dúas mesas redondas. A primeira, sobre a xestión dos recursos minerais e termais, contou cunha conferencia sobre as competencias estatais e autonómicas en materia de augas minerais e termais a cargo de Antonio Fanlo, catedrático emérito de Dereito Administrativo da Universidad de La Rioja, e outra sobre o uso lúdico das augas termais, concretamente sobre a Lei 8/2019, do 23 de decembro, de regulación do aproveitamento lúdico das augas termais de Galicia, a cargo de Alba Nogueira, catedrática de Dereito Administrativo da Universidade de Santiago de Compostela. A mesa estivo moderada polo catedrático de Dereito Administrativo da UVigo Roberto O. Bustillo.

A segunda mesa, centrada na xestión dos recursos xeotérmicos, contou con outras dúas intervencións. A primeira foi sobre a ordenación e xestión dos recursos xeotérmicos na lexislación de minas e de augas, con especial referencia a Galicia, realizada por Sofía Salgado, contratada predoutoral FPU da Universidade de Vigo. A outra intervención centrouse na xestión dos recursos xeotérmicos desde a perspectiva empresarial, a cargo de José Ángel Cid, da empresa XeoAquis. Neste caso o moderador foi José Ángel Vázquez, profesor titular da Universidade de Vigo.