Sete cursos para "estender" os teus coñecementos tecnolóxicos, medioambientais ou artísticos

Con catro novas propostas, do total de sete que se impartirán, a UVigo iniciará o 8 de xuño unha nova quenda de cursos de extensión no campus vigués, unha oferta caracterizada pola súa “transversalidade, que aborda temáticas que non se tratan nas aulas e que non precisa unha base de coñecemento previa”, explica Susana Reboreda, vicerreitora de Extensión Universitaria. Nas semana previas ao inicio das formacións, Reboreda destaca o incremento experimentado nos últimos anos na solicitude e na propostas de cursos de extensión, “cando eu cheguei a principio do mandato, no campus de Vigo, as solicitudes que se presentaban eran inferiores á oferta posible de cursos, pero nos dous últimos anos presentáronse máis solicitudes que dispoñibilidade, o que demostra que é unha opción que triunfa”.

Xornadas de botánica de campo: observación, identificación e usos da flora local; Mala muller. Arquetipos femininos no terror; O corpo na arte contemporánea dende unha perspectiva interdisciplinar e Robótica open source: deseña, imprime e programa o teu robot, son os cursos que este ano se incorporan por vez primeira á oferta do campus vigués. Unha proposta á que Reboreda invita a participar, non só aos membros da comunidade universitaria, senón a toda a sociedade, “porque creo que é un xeito de formación diferente e atractiva, cun alto compoñente práctico e que se fan en lugares diferentes aos que habitualmente utilizamos para impartir docencia”.

A matricula que se abriu o 18 de maio pechará en función das datas nas que se imparte cada un dos cursos e pode realizarse a través de Campus Activo.

A oferta polo miúdo 

O primeiro dos cursos que se impartirá será o de Xornadas de botánica de campo: observación, identificación e usos da flora local, a cargo da docente do Departamento de Bioloxía Vexetal e Ciencias do Solo María Cabaleiro Alfaya. Unha formación de 25 horas, que oferta 24 prazas e que se desenvolverá na Facultade de Bioloxía, entre o 8 e 12 de xuño.

O edificio Redeiras, pola súa banda, acollerá entre os días 29 de xuño e 22 de xullo, o curso Mala muller. Arquetipos femininos no terror. Xiana Vázquez Bouzó, docente do Departamento de Filoloxía Inglesa, Francesa e Alemá, será a encarga de impartir as 32 horas desde curso que oferta 20 prazas.

Do 10 ao 12 de xullo a actividade dos cursos de extensión desprazarase a Villafranca do Bierzo en León, onde se desenvolverá unha das formacións máis veteranas, Patrimonio natural e cultural do Bierzo: o sendeiro faise camiñando. A docente e investigadora do Departamento de Ecoloxía e Bioloxía Animal Josefina Garrido será, un ano máis, a encargada de dirixir o curso que oferta 60 prazas. 

O catro restantes desenvolveranse á volta da vacacións de verán, comezando o 31 de agosto por Fai o teu propio satélite. Guillermo Calvo, investigador de atlanTTic, impartirá as 30 horas da formación ata o 4 de setembro na Escola de Enxeñaría de Telecomunicación. 25 son as prazas ofertadas para este curso. Do 1 ao 9 de setembro no Hospital Álvaro Cunqueiro impartirase o curso Enfrontarse as urxencias cardiovasculares dende o ámbito clínico e tecnolóxico. A docente asociada de Ciencias da Saúde María Sol Bravo dirixe esta formación de 25 horas que oferta 24 prazas. 

E para rematar, O corpo na arte contemporánea dende unha perspectiva interdisciplinar e Robótica open source: deseña, imprime e programa o teu robot, pecharán entre o 23 de setembro e o 9 de outubro esta oferta formativa do Vicerreitoría de Extensión. Iria Vázquez, docente do Departamento de Debuxo, impartirá o primeiro dos cursos no Museo de Arte Contemporánea de Vigo, mentres que o enxeñeiro Yago González dirixirá o segundo na Escola de Enxeñaría de Telecomunicación.