Suso Novás afondará no característico humor satírico que Alexander Kluge aportou ao novo cinema alemán

Os asistentes á sexta sesión do ciclo de cine A ollada moderna de Alexander Kluge, poderán escoitar unha das clases maxistrais do profesional Suso Novás sobre a industria cinematográfica na Alemaña da segunda metade do século XX. Nesta ocasión afondarase especialmente no característico humor satírico que o realizador aportou ao novo cinema alemán apoiado no filme Ferdinando el duro, que se proxectará esta tarde na Casa das Campás.
A intención é “establecer un debate entre os participantes para analizar as doazóns que Kluge fixo á pantalla grande”, comentou Novás, baseado na que é probablemente a súa obra máis cómica, onde mellor desprega o seu humor satírico, que serve para resaltar o absurdo das situacións, dos razoamentos e dos comportamentos e que está totalmente ausente na filmografía da maioría dos seus colegas do novo cinema alemán.
O traballo de Kluge non está interesado en conquistar ao espectador nin en propor unha serie de asociacións predeterminadas, senón que confía na capacidade do ser humano para conformar o significado do filme na súa imaxinación, sen que nunca sexa preciso entendelo todo. Deste xeito, as súas películas estimulan ao público a que se relaxe e desenvolva a habilidade de establecer asociacións entre ideas totalmente dispares.

“Ferdinando el duro”

O filme que se proxectará na sexta sesión do ciclo de cine A ollada moderna de Alexander Kluge, data do ano 1976 e conta a vida dun xefe de seguridade dunha fábrica. Trátase dun extremista que non acepta moverse dentro do marco constitucional e as súas tarefas de vixilancia alcanzan ao director da empresa, a quen acusa de sabotar as fábricas veciñas, e a un ministro, a quen atenta para demostrar que soamente os seus métodos son seguros. A diferenza de outros filmes de Kluge, absolutamente radicais, esta é unha obra accesible e natural dentro da feroz sátira que presenta respecto aos perigos do poder e á paranoia dos vixiantes. O realizador alemán exhibiu esta película ante os obreiros que coñecían ben a personaxes como Ferdinando e aceptou o consello de agregar ao remate unha entrevista ao protagonista na que explica as súas intencións.