Todo listo para a celebración en Vigo do principal cumio mundial de criptografía cuántica

Xa está todo listo para a celebración en Vigo o vindeiro mes de setembro do principal cumio mundial de criptografía cuántica, o 14th International Conference on Quantum Cryptography, QCrypt, un evento que, por primeira vez na súa historia, se celebra en España. Organizado pola Universidade de Vigo e o Centro de Supercomputación de Galicia, Cesga, a cita será do 2 ao 6 de setembro na seda Afundación coa participación de arredor de 250 participantes, a inmensa maioría internacionais, procedentes de países como China, Xapón, Canadá, Inglaterra, Austria, Italia, Corea do Sur, Francia, Suíza, Australia, Singapur, Estados Unidos, Rusia, Israel, Alemaña… que traballan nas múltiples vertentes que inclúe o desenvolvemento deste tipo de tecnoloxías que velan, sobre todo, polo incremento constante da seguridade e confidencialidade das comunicacións.

“Qcrypt é o congreso internacional máis relevante no campo das comunicacións cuánticas e, nesta edición, ao igual ca nas anteriores, contamos coa participación dos principais expertos internacionais nesta área”, explica o responsable do comité organizador, Marcos Curty,  catedrático da Escola de Enxeñaría de Telecomunicación e director científico do Vigo Quantum Communication Center, adscrito ao centro de investigación AtlanTTic, no que colaboran empresas e universidades dunha ducia de países e co que se contribuíu de xeito definitivo a situar a Galicia no mapa mundial das comunicación cuánticas.

Desde a UVigo presentaranse 15 traballos de investigación

A conferencia anual sobre criptografía cuántica, QCrypt, é un encontro internacional aberto ao estudantado e á comunidade investigadora que traballa en todos os aspectos da criptografía cuántica, o que inclúe investigacións teóricas e experimentais sobre as posibilidades e limitacións da comunicación e a computación seguras con dispositivos que explotan os efectos da mecánica cuántica, ou na presenza de dispositivos que empregan estas tecnoloxías.

 “Desde a Universidade de Vigo, como organizadores en activo, presentaremos 15 traballos de investigación realizados neste último ano”, explica Curty, ao que engade que, debido ao alto interese amosado por moitas das persoas participantes, está previsto realizar para eles unha visita guiada aos laboratorios experimentais do centro vigués de comunicacións cuánticas, “na que lle amosaremos as fabulosas instalacións coas que contamos na Universidade de Vigo neste eido”.

O programa inclúe unha charla divulgativa aberta ao público en xeral

Se ben o programa definitivo non se fará público ata dentro duns días na web do congreso, serán tres xornadas -de 09.00 h a 18.00 h- de intensas actividades. Comezarase o luns 2 cunha pequena benvida e, a partires de aí, arrancarase cos 13 relatorios de poñentes convidados e  22 ‘contributed talks’, “relatorios seleccionados para a súa presentación oral entre todos os recibidos, que superaron os 150”, explica Curty, ao que engade que tamén se exporán en torno a 170 pósters. 

Para o martes día 3, ás 19.00 horas, está prevista unha charla divulgativa aberta ao público en xeral sobre comunicacións cuánticas impartida polo prestixioso físico Antonio Acín, especialista en información cuántica do Instituto de Ciencias Fotónica, ICFO, e cuxos traballos sobre como se pode codificar, procesar e transmitir información en partículas abriu novas portas á transmisión de datos máis segura.

Importante papel das principais empresas do sector

O xoves 5 haberá unha sesión “industrial” liderada por un representante de Telefónica, na que tamén participarán representantes das principais empresas internacionais do sector, así como, posiblemente da Comisión Europea, “que neste momento lidera unha iniciativa sumamente ambiciosa que busca despregar unha rede de comunicacións cuánticas no noso continente durante esta  década”, apunta o coordinador do congreso.