A Universidade busca os seus youtubers científicos

A Unidade de Cultura Científica e da Innovación (UCC+i) da Universidade de Vigo convoca a terceira edición do concurso de vídeos Youtubers científicos. Esta iniciativa, que se enmarca dentro do plan anual Ciencia de ida e volta, coa colaboración da Fundación Española para la Ciencia y la Tecnología-Ministerio de Ciencia e Innovación, busca potenciar a capacidade de divulgación e comunicación social da ciencia por parte do persoal investigador da institución. O obxectivo é que, a través dun vídeo curto, as persoas participantes dean visibilidade ao seu traballo ou a outro contido de carácter científico ou tecnolóxico que consideren de relevancia e interese para a cidadanía.

Os vídeos, que deben ser divulgativos e amenos, poden presentarse ao certame dende hoxe martes ata o vindeiro 5 de xuño. No referido ao formato, deben estar en mp4, gravados en horizontal e cunha duración máxima de dous minutos e poden estar tanto en galego como en castelán. Na súa elaboración, o persoal investigador poderá empregar toda clase de elementos que enriquezan o contido, o ilustren ou axuden a captar a atención da audiencia e non se poderán presentar traballos realizados por profesionais, axencias ou difundidos ou publicados con anterioridade á data do concurso.

Unha vez pechado o prazo de recepción, os vídeos subiranse á canle de YouTube da Unidade de Cultura Científica e da Innovación da Universidade de Vigo, para a súa difusión e valoración por parte do público, que será o encargado de elixir unha das dúas propostas gañadoras. A outra será seleccionada polo xurado e Ambas recibirán como premio cadanseu kit de produtos de iniciación para vlogging, valorado en arredor de 400 euros. O premio do público será para o vídeo que obteña máis gústame e estas votacións estarán abertas entre o 6 e o 10 de xuño de 2024. A decisión do xurado, que se anunciará o 14 de xuño, atenderá a criterios relacionados co contido, a creatividade e a calidade técnica das pezas audiovisuais. 

As propostas deben enviarse a ucc@uvigo.gal indicando no asunto: Participación no concurso de vídeos Youtubers científicos. No corpo do correo será necesario indicar o nome e apelidos completos, DNI e un teléfono de contacto. As bases completas do concurso poden consultarse aquí.

Dúas sesións de formación previa

Como nas edicións anteriores, previamente á fase do concurso, nestas últimas datas tiveron lugar unha serie de sesións formativas para persoal investigador da Universidade interesado en concursar. Nesta ocasión foi o xornalista Gabriel Fuentes o encargado de impartir a formación en liña os pasados 15 e 20 de maio. 

Nestas xornadas abordáronse aspectos técnicos como gravación, edición ou estratexias para identificar a audiencia e definir obxectivos, así como outras cuestións como a adaptación da mensaxe ao público, a estruturación do fío narrativo ou a comunicación pensando no proceso e no resultado.