Patrocinados pola Deputación de Ourense, contan cun orzamento de 80.000 euros
A Vicerreitoría do campus invita a refrescarse este verán con 12 cursos de extensión
En total ofértanse 734 prazas
12 cursos de verán compoñen a oferta que baixo o lema Refréscate ! propón a Vicerreitoría do campus para combater o calor estival. Natureza, informática, cultura e incluso enoloxía son algúns dos temas ao redor dos que xirarán os cursos patrocinados pola Deputación de Ourense, que xa comezaron en abril e que rematarán o vindeiro outubro.
Con 734 prazas en total, “fixemos un gran esforzo por incrementar o número de cursos e pasar dos oito do ano pasado aos 12 deste” explicou o vicerreitor, Juan Francisco Gálvez. Nesta ocasión o orzamento ascende a 80.000 euros “dos que temos que agradecer á Deputación que aportara a metade, permitíndonos así ter unha oferta tan variada” dixo Gálvez e estendeu a súa gratitude “a todos os concellos que participan e sobre todo aos directores e coordinadores dos cursos, polo seu esforzo en dotalos de tanta calidade”.
Pola súa banda o presidente da Deputación, José Luis Baltar, definiu a universidade como “unha industria que non contamina, que é sostible e que cada ano mellora a súa oferta con novos temas de grande interese para a cidadanía”, polo que reiterou o seu apoio “ é a nosa obriga colaborar coa actividade deste campus, algo do que podemos presumir e que vai seguir medrando” concluíu.
Representación de todos os ámbitos
O criterio para seleccionar os cursos de verán que compoñen a oferta foi “que todos os ámbitos estiveran representados; o humanístico, o xurídico social, o científico e o tecnolóxico” explicou Gálvez. Pese ás restriccións orzamentarias “fixemos un importante esforzo dende todas as entidades implicadas para que ningunha das propostas quedara fóra” engadiu.Así, algúns dos cursos xa se celebraron como o de Turismo e Natureza, que tivo lugar no mes de abril no concello de Foz, sendo o primeiro que se desenvolveu fóra da provincia de Ourense. Ademais o de Contratos do sector público en España, celebrado por segunda vez en Bande tamén se adiantou a ese mesmo mes “xa que coincidiu coa entrada en vigor da nova lei e quixemos facelo antes dos exames” explicou o vicerreitor engadindo que “ambos cursos foron un éxito e cubriron todas as súas prazas”. De feito a acollida dos cursos de verán está sendo moi boa, tanto que algúns deles xa teñen completa a matrícula a un mes do seu comezo como o de Cata de viños, augardentes e licores e o de A nova fiscalidade das persoas físicas: liquidación e planificación do comportamento fiscal.
Sen embargo os interesados aínda poden anotarse nos cursos de Ferramentas de seguridade en GNU/Linux, baseado en instrumentos de software libre, Frameworks de desenvolvemento cliente servidor sobre as plataformas de creación de aplicacións, Galegos de Ourense, Os sons e as imaxes da información. Radio, TV e Internet, Novos horizontes nos antioxidantes naturais, Hidacio da Limia e o seu tempo: a Gallaecia sueva, que terá lugar en Xinzo, como soe ser tradicional nos organizados pola Facultade de Historia, Retos e Perspectivas na conservación do medio ambiente no século XXI, que se celebra na Serra do Xurés e Deporte, empresa e sociedade: promoción turística a través do deporte. Este último terá lugar fóra do prazo habitual nos cursos de verán debido a que os alumnos da Facultade de Ciencias Empresariais e Turismo, organizadora, realizan prácticas durante a tempada estival.
A participación do Concello de Celanova
Algúns dos cursos de verán celebraranse fóra da cidade de Ourense e das instalacións do campus, destacando o papel do Concello de Celanova, que nesta ocasión acolle os obradoiros de Galegos Ilustres e Os sons e as imaxes da información. Radio, televisión e internet. “Dende o ano 92 a Vicerreitoría prestounos o seu apoio permitíndonos celebrar unha media de dous ou tres cursos por ano, coa importancia que iso supón para nós” explicou o seu alcalde, Antonio Mouriño. Ademais de agradecerlle á Universidade de Vigo a deferencia, “tamén temos que darlle as grazas á Deputación Provincial por colaborar cos pequenos concellos como o noso, xa que sen a súa axuda non poderíamos acoller estas actividades” dixo. A participación do concello nos cursos suma 6.000 euros, “que xa temos contemplados nos presupostos municipais todos os anos para este concepto, aínda que lamentamos non ter máis medios” engadiu o seu alcalde.Datos para os interesados
As taxas de inscrición oscilan entre os 120 euros do curso de Retos e Perspectivas na conservación do medio ambiente no século XXI que inclúe aloxamiento e comidas durante os tres días que dura e os 20 euros do de Novos horizontes nos antioxidantes naturais. Sobre o prezo establecido, os alumnos da Universidade de Vigo que sexan bolseiros do MEC terán un 50% de reducción e o resto dos membros da comunidade universitaria un 25%. Para os cursos que se celebran fóra do campus, o transporte será gratuíto dende este.Os interesados en inscribirse ou recibir máis información poden chamar ao teléfono 988387313, enviar un email a vicou@uvigo.es ou consultar a páxina web.