DUVI

Diario da Universidade de Vigo

A Escola de Enxeñería Industrial acolleu este evento centrado nas tecnoloxías XR

Unha xornada achega as claves da aplicación da realidade aumentada, a virtual e a mixta nos procesos industriais

Coa participación de representantes de empresas como Arsoft, Sonovision, Navantia e Cidaut

Etiquetas
  • Estudantes
  • PAS
  • PDI
  • Vigo
  • TIC
  • Universidade e empresa
  • Investigación
M. Del Río DUVI 29/04/2022

A transformación do tecido industrial cara un escenario 4.0 implica múltiples procesos de automatización, dixitalización, aplicación de intelixencia artificial ou conectividade. Neste proceso as tecnoloxías XR, que engloban a realidade virtual, aumentada e mixta, tamén están a ter un peso cada vez máis destacado, xa que permiten, por exemplo, a creación de prototipos en 3D, probas inmersivas de produtos, monitoraxe en remoto, formación virtual dos operarios, etc.

Para analizar todas as posibilidades que estas tecnoloxías emerxentes ofrecen ao sector industrial e avaliar o xeito de implantalas de xeito sostible e eficiente nas empresas, a Escola de Enxeñería Industrial da UVigo acolleu este venres un seminario impartido por Arsoft, empresa especializada no uso da realidade virtual e aumentada, no que participaron tamén outras compañías que xa contan con experiencia no uso de tecnoloxías XR nos seus procesos industriais, como Sonovision, Navantia e Cidaut, que expuxeron os seus casos de éxito.

O encargado de dar a benvida ás persoas participantes foi Juan Pardo Froján, o director da EEI, que agradeceu a colaboración das empresas para poñer celebrar este evento e recalcou o compromiso do centro para achegar as novas tecnoloxías, coñecementos e avances á súa comunidade universitaria. “Temos ante nós grandes retos e tamén grandes oportunidades” e, nese contexto, subliñou a importancia de introducir estas novas tecnoloxías como ferramentas para mellorar os resultados da aprendizaxe e tamén para a súa aplicación no eido da investigación e a innovación, “dada a estreita relación que a escola ten co tecido empresarial”.

Realidade virtual, realidade aumentada e realidade mixta 

A primeira parte da xornada centrouse en afondar nas tecnoloxías XR e as súas aplicacións, da man de Santiago González, CEO de Arsoft. O responsable da empresa comezou por explicar que as tecnoloxías de realidade estendida (tecnoloxías XR polas súas siglas en inglés) son todas aquelas que crean contornas e obxectos xerados por ordenador e permiten unha experiencia inmersiva mediante a cal as persoas usuarias se mergullan nun mundo virtual ou interactúan cunha extensión deste.

Dentro deste concepto englóbanse a realidade virtual, a realidade aumentada e a realidade mixta. A primeira ofrece unha inmersión completa nun mundo virtual mediante o uso de gafas que non permiten ver a contorna que está arredor. A realidade aumentada, pola súa banda, “é todo o contrario", explicaba González, xa que permite a visualización de capas virtuais superpostas sobre o mundo real mediante un dispositivo móbil ou unhas gafas. Por exemplo, grazas a esta tecnoloxía, apuntaba, “podería ver a todas as persoas da sala co seu perfil de Linkedin superposto”, é dicir, “segues vendo a realidade pero con información virtual que a complementa”. Finalmente, a realidade mixta implica “ir un paso máis aló, un avance da tecnoloxía de realidade aumentada”, na que os elementos virtuais están perfectamente integrados na contorna e permiten interactuar. Por exemplo, explicaba, “podería estar dentro dun avión e as gafas estarían recoñecendo o avión e explicando determinados procesos”. Estas tecnoloxías, engadía, “están avanzando moi rápido e mesmo estanse deseñando lentes de contacto con pixels integrados para empregar en lugar das gafas”.

Aplicacións na industria

O responsable de Arsoft tamén explicou as utilidades e aplicacións de cada unha destas tres tecnoloxías no eido industrial. Así, a realidade virtual está moi presente na industria e emprégase para adestramento, capacitación e formación “pola cantidade de cartos que aforran as empresas” ao non ter que desprazar formadores nin material, como prototipos de vehículos ou maquinaria, para formar os técnicos nos diferentes procesos. Tamén se usa para a monitorización remota, xa que cunhas gafas, explicaba González, “eu podería camiñar por unha planta industrial e ver en tempo real como está funcionando”.

No que se refire á aplicación da realidade aumentada, as vantaxes radican en que permite ter acceso a información de forma instantánea, situando datos sobre os obxectos reais de forma que se poidan aumentar a información sobre eles. Un caso de uso común, destacaba, é a asistencia técnica remota aos operarios ou o acceso a documentación técnica dunha máquina ou proceso, “que é cara a onde vai camiñando a industria, non imos ter manuais en pdf, senón en realidade aumentada de modo que calquera as poida entender”. 

A realidade mixta está empregándose en procesos de inspección, nos que as gafas ademais permiten rexistrar información en tempo real, “sen ter que anotar en papel que, por desgraza, é o estado actual das cousas na maioría das industriais”. Tamén se emprega no deseño avanzado, xa que permite situar en espazos reais prototipos de maquinaria, estacións de robots, etc. para comprobar na fase de deseño a configuración final.

A sostibilidade é a clave

Pero para facilitar o uso e implantación deste tipo de tecnoloxías emerxentes nas empresas é imprescindible que este proceso sexa sostible e eficiente. “As empresas teñen miles ou ducias de miles de procesos”, lembraba González, e “non poden empregar a alguén externo” para adaptar estes procesos ás tecnoloxías XR. Por isto, a clave do uso de tecnoloxías XR de xeito sostible está, segundo o responsable de Arsoft, en “non depender de terceiros”. Para iso a proposta de Arsoft é Eyeflow, unha plataforma que “aforra o 90% dos custes e tempo na creación de contidos de tecnoloxías XR”. Deste xeito, son os clientes os que teñen o control e propiedade dos contidos, non dependen dun programador para deseñar os contidos, senón que calquera, tras unha formación inicial de catro hora, pode xerar os contidos a través desta plataforma para procesos de formación, mantemento, soporte, rexistro, apoio, etc.

A xornada completouse cunha sesión de demostracións prácticas de tecnoloxías XR, a explicación de casos de éxito no seu uso en empresas e cunha mesa redonda sobre o futuro destas tecnoloxía e a súa integración co xemelgo dixital.