Unha xornada incide no campus no papel do traballo social na prevención da conduta suicida

Este mércores desenvolveuse na Facultade de Educación e Traballo Social do campus de Ourense a xornada Traballo social e prevención da conduta suicida. Da evidencia científica á intervención profesional. A actividade estivo organizada polo Grupo de Estudos en Traballo Social: Investigación e Transferencia (GETS-IT) da Universidade de Vigo. 

Á xornada asistiu alumnado da citada facultade, especialmente do seu Grao en Traballo Social, e púxose en marcha aproveitando que o pasado 10 de setembro celebrouse o Día Mundial para a Prevención do Suicidio, impulsado pola Organización Mundial da Saúde e a Asociación Internacional para a Prevención do Suicidio. Contou coa participación de Paula Frieiro, coordinadora da actividade desde o GETS-IT e profesora da Área Traballo Social e Servizos Sociais, e Beatriz Gómez, traballadora social do Sergas.

Respecto ao papel do traballo social e dos seus profesionais nesta prevención, Paula Frieiro salientou que “temos que estar visibles e saber abordar o tema”. Deste xeito, a xornada quixo ofrecer ao alumnado asistente unha contextualización desta temática, con datos de incidencia, e presentarlle recursos e ferramentas para traballar directamente na prevención da conduta suicida, especialmente entre a mocidade. “Queremos pór o foco na importancia da prevención e nos recursos e proxectos hai para fomentala”, subliñou Beatriz Gómez, facendo fincapé na relevancia de que o achegamento a esta problemática se faga “desde unha ollada de apoio, de posta a disposición de recursos”. 

Entre outras cuestións, na xornada falaron de programas de prevención de suicidios como Yam, que se leva a cabo en institutos. Esta iniciativa, sinalaron, “enfócase moito en temas de saúde mental e a busca de axuda”, implicando á propia mocidade “para que saiba a onde acudir, para que fale, que escoite e que vexa os recursos de diferente tipo que lle poden servir de axuda e sostén”. Así, desde a organización da xornada celebrada este mércores no campus lembraron a evidencia de que para a prevención da conduta suicida, os lazos, os vínculos familiares e as redes de apoio de diferente tipo “importan, son relevantes”.