Unhas xornadas afondan en como mellorar as fontes de pole que teñen as abellas en eucaliptais

Este venres a Facultades de Ciencias do campus de Ourense acolleu a celebración dunha xornada titulada Fomentando a biodiversidade: + recursos apícolas en contornas forestais. A iniciativa enmárcase no desenvolvemento dun proxecto que, co mesmo título e financiado polo V Plan Social Ence Pontevedra, está a desenvolver o Grupo de Investigación en Sistemas Agroambientais da Universidade de Vigo co obxectivo de mellorar a apicultura en eucaliptais. 

Na xornada houbo conferencias sobre a diversidade de recursos apícolas en España e as bases para unha apicultura sostible; sobre as axudas á apicultura; sobre abellas, apicultura e desafíos do cambio climático e a perda de biodiversidade; e sobre o valor nutricional do pole apícola. Foron ofrecidas por Amelia Virginia González, do Instituto Regional de Investigación y Desarrollo Agroalimentario y Forestal de Castilla-La Mancha e o Centro de Investigación Apícola y Agroambiental de Marchamalo; Marcos Barreiro, xefe do servizo de Análise e Informes da Dirección Xeral de Gandaría, Agricultura e Industrias Agroalimentarias da Consellería do Medio Rural; Antonio Nanetti, do Centro di Ricerca Agricoltura e Ambiente, do Consiglio per la Ricerca in Agricoltura e l’Analisi dell’Economia Agraria, de Bolonia (Italia); e Soraia Isabel Marcos Falçao, do Centro de Investigação de Montanha, do Instituto Politécnico de Bragança (Portugal). Xa pola tarde houbo obradoiros de análise palinolóxica do mel e outro sobre o seu universo sensorial.

Os retos da apicultura

Na inauguración da xornada, Francisco Javier Rodríguez, vicerreitor do campus de Ourense, salientou a dilatada traxectoria do grupo organizador en temas apícolas e o tamén o compromiso do Instituto de Agroecoloxía e Alimentación da UVigo no desenvolvemento deste tipo de liñas de investigación. O responsable académico apuntou que “vivimos un momento no que a apicultura afronta retos moi significativos”, citando o cambio climático, a perda de hábitats, os incendios forestais, a homoxeneización da paisaxe, a diminución de especies vexetais melíferas e pragas como a avespa velutina. “Ante este panorama, fortalecer a diversidades de recursos dispoñibles para as abellas non é só unha estratexia técnica, é un compromiso coa biodiversidade, coa seguridade alimentaria e co futuro das nosas comunidades rurais”, afirmou Francisco Javier Rodríguez, membro tamén do Grupo de Investigación en Sistemas Agroambientais da UVigo.

A responsable do proxecto Fomentando a biodiversidade: + recursos apícolas en contornas forestais, a catedrática da UVigo e coordinadora do Grupo de investigación en Sistemas Agroambientais María del Carmen Seijo, explicou que os obxectivos desta iniciativa son incrementar a dispoñibilidade de especies produtoras de pole de calidade na contorna das colmeas; aumentar a biodiversidade en áreas forestais e promover a apicultura en áreas forestais mellorando o estado nutricional das colonias. Para acadar estes obxectivos, o proxecto conta con diferentes liñas de acción. Entre elas están realizar ensaios de campo en colmeas situadas nos municipios de Marín, Poio e Pontevedra, seleccionando un conxunto de colmeas en cada lugar para realizar o seguimento das fontes de pole que as abellas obteñen da contorna. Ao seu abeiro tamén se fará a cuantificación do valor nutritivo do pole colleitado polas abellas e o seguimento sistemático das especies en flor na contorna. Por último, levarase a cabo o deseño dun programa para a introdución de especies que fornezan pole de boa calidade para as abellas, co obxectivo de aumentar a dispoñibilidade deste alimento esencial para os polinizadores. 

Segundo comentou a catedrática da UVigo, traballos previos teñen sinalado unha “crecente tendencia á desaparición de colonias de abellas melíferas en todo o mundo” e a súa mortalidade asóciase a diferentes factores, entre os que se atopa “a calidade nutritiva” e a diversidade do pole que teñen á súa disposición. O proxecto, dentro das súas limitacións, sinalou, proponse analizar que tipo de recursos hai nas contornas forestais de eucaliptais, que calidade achegan á apicultura e facer propostas de mellora destes recursos apostando pola biodiversidade.