Cousas que podes facer para cambiar o mundo
E ti, que estás a facer polo mundo? Convértete en axente do cambio!
A Axenda 2030 está en marcha.
Como institución pública e referente social, a Universidade de Vigo ten a obriga de liderar o cambio que representa a Axenda 2030 a través dunha estratexia que aliñe as súas políticas cos dezasete obxectivos de desenvolvemento sostible.
Máis aló da institución, os membros da comunidade universitaria temos tamén a nosa responsabilidade individual de intentar acadar un planeta máis xusto, igualitario, solidario e sostible. E podémolo facer mudando de hábitos ou reforzando determinadas actitudes, que beneficiarán outras persoas e o propio planeta.
A ONU póñenolo fácil con esta guía que adaptamos para ti. Convértete en axente do cambio!
Nivel 1: Cousas que podes facer desde o sofá
- Aforra electricidade enchufando os electrodomésticos nunha base múltiple e desconectándoos por completo cando non os utilices, mesmo o teu computador.
- Deixa de utilizar os estados de conta bancarios en papel e paga as túas facturas en liña ou a través do teléfono móbil.
- Comparte, non te limites a facer clic en «gústame». Se ves unha publicación interesante nas redes sociais sobre os dereitos da muller ou do cambio climático, compártea para que as persoas da túa rede tamén a vexan.
- Fala alto e claro! Pídelles ás autoridades locais e nacionais que participen en iniciativas que non danen as persoas nin o planeta. Antes da celebración das conferencias sobre o cambio climático, podes asinar esta petición para pedirlles aos/ás líderes que cheguen a un acordo para reducir as emisións de carbono.
- Apaga as luces. A televisión e a pantalla do computador xa emiten unha luminosidade cómoda, así que apaga as outras luces se non as necesitas.
- Investiga un pouco pola rede e compra só en empresas que saibas que aplican prácticas sustentables e non danan o medio ambiente.
- Denuncia o acoso en liña. Se observas acoso nun taboleiro de mensaxes ou nun foro de debate, sinala o seu autor ou autora.
- Mantente informado. Sigue as nosas noticias locais e estate ao día sobre os obxectivos mundiais en liña ou nas redes sociais a través de @ GlobalGoalsUN.
- Cóntanos o que fas para lograr os obxectivos mundiais utilizando a etiqueta #globalgoals nas redes sociais.
- Compensa as túas emisións de carbono! Xa podes calcular a túa pegada de carbono e comprar crédito climático en Climate Neutral Now (só dispoñible en inglés).
Nivel 2: Cousas que podes facer na casa
- Seca as cousas ao aire. Deixa que o pelo e a roupa sequen de forma natural en lugar de prender unha máquina. Cando laves a roupa, asegúrate de que a carga está completa.
- Toma duchas curtas. As bañeiras necesitan moitos máis litros de auga ca unha ducha de entre 5 e 10 minutos.
- Come menos carne e peixe. Destínanse máis recursos para a obtención de carne que para o crecemento das plantas.
- Conxela os produtos frescos e as sobras se non vas poder comelos antes de que se estraguen. Tamén podes facelo coa comida para levar, se sabes que non te vai apetecer comela ao día seguinte. Así, aforrarás comida e cartos.
- Fertilizantes orgánicos: utilizar os restos de alimentos como fertilizante pode reducir os efectos do cambio climático ao mesmo tempo que se reciclan os nutrientes.
- A reciclaxe de papel, plástico, vidro e aluminio impide que os vertedoiros sigan crecendo.
- Compra produtos que estean minimamente empaquetados.
- Evita prequentar o forno. A excepción de que necesite unha determinada temperatura de cocción, comeza a quentar a comida xusto ao prender o forno.
- Illa as xanelas e as portas para aumentar a eficiencia enerxética.
- Axusta o teu termóstato, máis baixo no inverno e máis alto no verán.
- Substitúe os electrodomésticos vellos por modelos que acheguen un consumo enerxético máis eficiente e cambia as lámpadas da casa.
- Se podes, instala paneis solares na túa casa. Deste xeito, tamén se reducirá a túa factura de electricidade!
- Pon moqueta. As alfombras e as moquetas manteñen a casa quente e o termóstato baixo.
- Non enxaugues a vaixela. Se utilizas lavalouzas, non enxaugues os pratos antes de metelos na máquina.
- Escolle unha mellor alternativa de cueiros. Envolve o teu bebé en cueiros de tea ou en cueiros desbotables e ecolóxicos dunha marca nova.
- Retira a neve manualmente. Evita os ruidosos sopradores de neve, que producen gases de escape, e fai un pouco de exercicio.
- Utiliza mistos de cartón. Non necesitan nada de petróleo, a diferenza dos chisqueiros de gas fabricados de plástico.
Nivel 3: Cousas que podes facer fóra da casa
- Compra produtos locais. Apoiar os negocios da zona axuda a xente a conservar o seu emprego e contribúe a impedir que os camións teñan que desprazarse grandes distancias.
- Compra con cabeza: planifica as comidas, fai listaxes da compra e evita as compras impulsivas. Non sucumbas ante os trucos de comercialización que te levan a comprar máis alimentos dos que necesitas, sobre todo no que respecta aos produtos perecedoiros. Aínda que poden ser máis baratos por peso, ao final poden resultar máis caros se temos que refugar gran parte desa comida.
- Compra froita de aspecto raro: moitas pezas de froita e verdura tíranse por non ter o tamaño, forma ou cor «axeitados». Ao comprar estas pezas de froita que están en bo estado a pesar de ter un aspecto raro, xa sexa no mercado do produtor ou en calquera outro lugar, estamos a utilizar alimentos que doutro xeito poderían acabar no lixo.
- Cando vaias a un restaurante e pidas marisco, pregunta sempre se serven marisco sostible. Que os teus negocios favoritos saiban que o marisco obtido de forma respectuosa cos océanos está na túa listaxe da compra.
- Compra unicamente marisco sostible. Arestora, existen aplicacións como esta que che indican que produtos son seguros de consumir.
- Desprázate en bicicleta, andando ou en transporte público. Evita utilizar o coche agás cando teñas un grupo grande de persoas.
- Utiliza unha botella de auga e unha cunca de café reutilizables. Deste xeito, reducirás os refugallos e quizais ata poidas aforrar cartos na cafetaría.
- Leva a túa propia bolsa á compra. Deixa a bolsa de plástico e empeza a levar as túas propias bolsas reutilizables.
- Colle menos panos de mesa. Non necesitas unha manchea de panos de mesa para a comida que compras para levar. Toma só os que precises.
- Compra produtos de segunda man. As cousas novas non teñen por que ser as mellores. Visita tendas de segunda man para ver que podes volver utilizar.
- Mantén o coche en bo estado. Un coche a punto emitirá menos gases tóxicos.
- Doa o que non utilizas. As organizacións benéficas locais daranlle unha nova vida á túa roupa, aos teus libros e aos teus mobles pouco usados.
- Vacínate e vacina os teus fillos. Protexer a túa familia de enfermidades tamén axuda a saúde pública.
- Fai uso do teu dereito para elixir os/as líderes do teu país e comunidade local.
Nivel 4: Cousas que poderías facer desde o traballo
- Se tes algunha peza de froita ou algún aperitivo que non queiras, non o tires. Dállo a alguén que o necesite e estea a pedir axuda.
- Todo o mundo no traballo ten acceso á atención médica? Pescude que dereitos tes no traballo. Loita contra a desigualdade.
- Asesora a mocidade. Constitúe unha maneira atenta, estimulante e eficaz de orientar as persoas para mellorar o seu futuro.
- As mulleres gañan entre un 10 % e un 30 % menos ca os homes por realizar o mesmo traballo. A desigualdade de remuneración persiste en todas as contornas. Expresa o teu apoio co principio de igual salario por traballo igual.
- Existen 4000 millóns de persoas sen acceso a servizos básicos de saneamento. Denuncia no seu nome a carencia de retretes en numerosas comunidades de todo o mundo!
- Asegúrate de que a túa empresa utilice tecnoloxía de calefacción e de refrixeración enerxeticamente eficiente e axusta o termóstato a un nivel inferior no inverno e superior no verán.
- Mantente informado. Le sobre a situación dos traballadores/as noutros países e as prácticas empresariais. Fala cos teus/túas colegas sobre estas cuestións.
- Inviste a túa empresa en infraestrutura limpa e resiliente? É o único modo de protexer os traballadores/as e o medio ambiente.
- Alza a voz contra todo tipo de discriminación na túa oficina. Todas as persoas son iguais independentemente do seu xénero, raza, orientación sexual, orixe social e capacidade física.
- Vai ao traballo en bicicleta, camiñando ou en transporte público. Reserva os desprazamentos en coche para cando reúnas un grupo grande de persoas.
- Organiza no traballo unha Semana sen Impacto Ambiental. Aprende a vivir de maneira máis sostible durante polo menos unha semana: un. org/ sustainabledevelopment/ be- the- change.
- Expresa a súa opinión! Pídelles á túa empresa e ao teu goberno que leven a cabo iniciativas inocuas para as persoas ou o planeta. Manifesta o teu apoio ao Acordo de París!
- Gran parte dos refugallos que xeramos na Terra vai parar aos océanos.
- Analiza e modifica as decisións cotiás. Tes a posibilidade de reciclar no teu lugar de traballo? Realiza a túa empresa adquisicións a provedores que levan a cabo prácticas prexudiciais para o medio ambiente?
- Coñece cales son os teus dereitos no ámbito laboral. Saber que dereitos che asisten resultará de grande utilidade para acceder á xustiza.
- A responsabilidade social empresarial é importante! Anima a túa empresa a colaborar coa sociedade civil e a atopar formas de axudar as comunidades locais a lograr os obxectivos.
Máis información:
Área de Responsabilidade Social e Cooperación
Vicerreitoría de Responsabilidade Social, Internacionalización e Cooperación
+34 986 813 587
direc.rsco@uvigo.es