Día Internacional para Contrarrestar o Discurso de Odio 2025

Cada 18 de xuño conmemórase o Día Internacional para Contrarrestar o Discurso de Odio, unha data que non só nos convida a reflexionar, senón tamén a actuar.

O discurso de odio non sempre grita; moitas veces disfrázase de «opinión», de «broma» ou de «liberdade de expresión». Pero cando deshumaniza, discrimina ou incita á violencia, xa non estamos a falar de ideas, senón de ameazas reais contra a convivencia, a seguridade e a dignidade das persoas.

Este día é un recordatorio de que o silencio tamén pode ser cómplice. A neutralidade fronte ao odio prolonga a inxustiza. Por iso, é necesario fortalecer unha cultura de paz, igualdade e diálogo, onde cada voz sexa respectada e ningunha sexa silenciada por motivos de odio ou de intolerancia.

Contrarrestar o discurso de odio non implica limitar a liberdade de expresión, senón defendela daqueles usos que a converten nunha arma contra a dignidade das persoas. Requírense políticas públicas comprometidas cos dereitos humanos e unha implicación colectiva que atravesa todos os sectores da sociedade.

A educación xoga un papel esencial na prevención e na desactivación do discurso do odio, ao promover valores democráticos, o pensamento crítico e o respecto polos dereitos humanos. A universidade non só debe ser un espazo libre de odio, senón tamén un axente transformador que forme cidadáns e cidadás comprometidos, capaces de identificar e de rexeitar discursos discriminatorios. 

A través da docencia, a investigación e a proxección social, a institución universitaria ten a responsabilidade de contribuír á construción dunha sociedade máis xusta, plural e respectuosa coa diversidade.

Como advirte  António Guterres, secretario xeral da ONU, «O discurso de odio é un sinal de alarma: canto máis forte soa, maior é a ameaza de xenocidio. Antecede e promove a violencia». Esta afirmación non deixa lugar a dúbidas: o discurso de odio non é inocuo, senón un preludio perigoso que pode desembocar en actos de violencia extrema. Por iso, non abonda con condenalo; é urxente actuar, desde todos os ámbitos, para desactivalo antes de que se converta en dano irreparable.

Podes coñecer máis sobre a campaña que realiza a ONU para conmemorar este día aquí.