Día Mundial da Xustiza Social

UVigo – Responsabilidade social axenda 2030 19/02/2020

En novembro de 2007, a Asemblea Xeral das Nacións Unidas recoñeceu o valor do desenvolvemento e a xustiza sociais para a consecución e o mantemento da paz e da seguridade nas nacións e entre elas mesmas. Ao mesmo tempo, sinalou tamén que a paz e a seguridade non se acadarán se non se respectan os dereitos humanos e as liberdades fundamentais. En consecuencia, declarou o 20 de febreiro como Día Mundial da Xustiza Social. 

Non está clara a procedencia do termo «xustiza social», no entanto, nalgunhas obras sinálase a Luigi Taparelli d’Azeglio como a persoa que o empregou por primeira vez no 1843. Para Taparelli, «a xustiza social debe igualar de feito a todos os homes no referente aos dereitos da humanidade».

Esta expresión popularizouse pronto entre os movementos da clase obreira. No ano 1919 nace a Organización Internacional do Traballo (OIT), que na súa Constitución considera a xustiza social como un pilar fundamental na defensa dos dereitos laborais. 
Décadas despois, en 1995, ten lugar o Cume sobre Desenvolvemento Social no que se aproba a Declaración de Copenhague sobre Desenvolvemento Social. Este documento supón o compromiso dos Estados en acadar a xustiza social dentro do seu territorio e con respecto aos demais Estados.

Actualmente, a loita pola xustiza social está intimamente ligada aos Obxectivos de Desenvolvemento Sostible da Axenda 2030, vixente desde 2015. A xustiza social é un concepto transversal que non se pode asociar cun único ODS posto que, tal e como di a ONU, ten que ver coa igualdade de xénero, os dereitos dos pobos indíxenas e os migrantes ou a supresión das barreiras que afrontan as persoas por razóns de xénero, idade, raza, etnia, relixión, cultura ou discapacidade.

Desde a Área de Responsabilidade Social e Cooperación da Universidade de Vigo unímonos á conmemoración desta data, que este ano celébrase co lema «pechar a fenda das desigualdades para acadar a xustiza social».

 

Máis información:

Área de Responsabilidade Social e Cooperación
Vicerreitoría de Responsabilidade Social, Internacionalización e Cooperación
Edificio Miralles
As Lagoas, Marcosende
36310 Vigo
+34 986 813 587
direc.rsco@uvigo.gal