Promovido polo Club Peña Trevinca, coa colaboración da Universidade e do Concello de Vigo o III Ciclo de Montaña, Medio Ambiente e Cambio Climático Cidade Vigo desenvólvese entre os días 19 e 21  de marzo no Auditorio do Concello. O montañeiro Carlos Soria será o encargado de abrir esta terceira edición. Alpinista de enorme traxectoria que xa na década de 1970 formou parte das primeiras expedicións españolas ao Himalaia, ascendeu con éxito 12 oitomiles. Ingresou na Real Orde do Mérito Deportivo e obtivo a Medalla de Prata ao Mérito Deportivo do CSD. A través dun documental, fará viaxar ao público longo da súa impresionante vida na alta montaña. O xornalista de Faro de Vigo Armando Álvarez será o encargado de presentalo.