O curso de oratoria e comunicación para docentes esgota todas as prazas na súa primeira edición

A Área de Formación e Innovación Educativa encárgase de ofrecer cursos, talleres e obradoiros relacionados coa mellora das competencias docentes de cara ao desempeño profesional do PDI. Estas actividades responden a que este colectivo posúe coñecementos moi amplos e fondos, mais ten un nivel de desempeño menor nas competencias didácticas. Así, para aumentar o seu dominio neste ámbito, entre os días  2 e 30 de maio, terá lugar o curso de Oratoria e Comunicación para docentes. Esta iniciativa, que se oferta por primeira vez, está a ter moi boa acollida e, a tres meses da súa celebración, hai máis xente preinscrita que prazas ofertadas.

O curso será impartido por Daniel Formoso, avogado e experto en oratoria, que destaca que “o profesorado necesita facer que a clase sexa interesante e a oratoria facilita que a mensaxe que quere transmitir ao alumnado chegue con máis facilidade”. Así, esta disciplina convértese nunha ferramenta útil de cara a mellorar a  capacidade comunicativa do profesorado no momento de transmitir os coñecementos. “A xente non se dá conta da importancia da oratoria e a comunicación ata que acude a un curso e ve todo o que este campo pode ofrecer, tanto a nivel profesional como persoal”, subliña o docente. 

As persoas só reteñen un 20% da información por cada hora de escoita

A oratoria xira arredor do manexo da información, do seu tratamento e de como expresala para lograr unha comunicación eficaz, xa que as persoas teñen unha capacidade limitada de retención de datos.“A mente humana só retén un 20% de cada hora de escoita”, salienta Formoso. Por iso, non se pode dar moita información xunta, é necesario resumila para que os receptores sexan quen de quedar só co máis interesante e  se queren, afondar pola súa conta. Por iso resulta imprescindible “preparar o que vamos a contar antes de emitir a mensaxe”, subliña o docente do obradoiro.

Así, un orador ten que dominar tres materias: a mensaxe, a empatía e a transmisión eficaz da información. “Un bo comunicador ten que captar a atención, convencer e por último motivar aos seus oíntes”, salienta Formoso. Para acadalo, non só hai que traballar o aspecto verbal e o manexo da información, senón que tamén é importante a expresión non verbal (acenos, mirada, corpo) e os aspectos psicolóxicos (empatía e persuasión) que interveñen na comunicación. 

Para poder lograr unha comunicación efectiva, os oradores teñen que ser capaces de apropiarse do espazo, controlar a mirada, a xesticulación e tamén empatizar e persuadir para lograr que os oíntes entren dentro do discurso. Un adecuado control destes aspectos facilita que  “os docentes sexan capaces de facer que o alumnado interactue, de tal forma que as clases non sexan unha exposición e non se convertan en algo monótono e aburrido”, salienta Formoso. 

Unha aprendizaxe práctica

O curso, de 20 horas de duración, desenvolverase nas tardes dos xoves de maio entre as 16.00h e as 20.00h no campus de Vigo. Trátase dun obradoiro eminentemente práctico, que se dividirá en tres bloques principais: a mensaxe, o comunicador e a empatía, eixos sobre os que se traballará  para mellorar as capacidades oratorias dos docentes. Deste xeito, realizaranse exercicios que afondarán no control do medo escénico, do dominio do espazo, da improvisación e do autocontrol das emocións e do ego. 

Ao longo do curso traballarase coas técnicas básicas de comunicación, referidas a comunicación verbal e non verbal. Deste xeito, faranse exercicios referidos a dicción, fonación e impostación, así como teatrais, musicais ou de interpretación. “Todas elas resultan moi útiles no mundo da comunicación para poder dominar o espazo e manexar o medo escénico”, subliña Formoso. 

No que se refire ao aspecto psicolóxico da comunicación, ensinaranse técnicas de programación neurolingüística destinadas a lograr seguridade e confianza no momento de falar. Así, a través dun compendio de exercicios, os asistentes ao obradoiro aprenderán  a “captar a atención dos alumnos e alumnas dentro das aulas e espertar o seu interese na información que se está a transmitir”, destaca o docente do obradoiro.