Alumnado de Turismo participa na fase final de Talent Match

A competición interuniversitaria Talent Match, organizada polo Grupo Hotusa para potenciar o vínculo entre universidade e empresa, contou este ano coa participación de 11 centros universitarios españois e arredor de 150 estudantes. Esta fin de semana, o certame celebrou en Madrid a súa fase final reunindo a 40 deses estudantes, seleccionados pola calidade dos seus proxectos presentados a concurso. Entre eles estivo un equipo da Facultade de Ciencias Empresariais e Turismo do campus de Ourense, formado por Carolina Rodríguez, alumna de cuarto curso do Grao en Turismo, e Marta Vila, de quinto curso do programa conxunto Turismo-Historia. Elas presentaron un proxecto chamado True Experience, de adaptación de aloxamento para persoas con discapacidade visual.

Na competición, que finalmente gañou o equipo da Universitat Autònoma de Barcelona, as e os alumnos enfrontáronse ao reto de desenvolver novos modelos de negocio, conceptos hoteleiros ou servizos turísticos, realizando previamente unha análise do sector turístico e propondo solucións innovadoras que respondan e aproveiten as oportunidades que ofrece o mercado.