DUVI

Diario da Universidade de Vigo

Universidade e Deputación de Ourense renovan o seu marco de colaboración

145.000 euros para actividades culturais e de investigación

As dúas entidades traballan na posta en marcha de iniciativas para a captación de alumnado

Etiquetas
  • Ourense
  • Institucional
DUVI 03/11/2015

A Universidade de Vigo e a Deputación de Ourense renovarán en 2016 o seu marco de colaboración. Salustiano Mato, reitor da Universidade de Vigo, e Manuel Baltar, presidente da Deputación de Ourense, reuníronse este martes no Pazo de Vilamarín para analizar o convenio anual que veñen subscribindo as dúas entidades para a realización de cursos de extensión universitaria, obradoiros e actividades culturais e de investigación no campus de Ourense. No encontro acordouse que para o exercicio 2016 a cantidade que a entidade provincial achegará á institución académica por este concepto ascenderá a 145.000 euros.

Os representantes das dúas institucións tamén avanzaron na consolidación e posta en marcha de novas vías para o fomento da mobilidade e a captación de alumnado. Sobre as bolsas Ourense Exterior, o compromiso da Deputación é mantelas e, na medida do posible, incrementalas creando bolsas de estudo ligadas aos mellores expedientes, para que realicen estudos de grao no campus de Ourense. Outras posibilidades analizadas na reunión son bolsas ou axudas no transporte urbano, ou no transporte en tren ou autobús dende outros puntos da xeografía galega ou do estado ata Ourense, e axudas vinculadas á práctica deportiva, especialmente deportes acuáticos e ao uso de instalación balnearias. No ámbito das tecnoloxías da información, Baltar e Mato estudaron a creación dunha páxina web específica onde se promocione conxuntamente a provincia e campus de Ourense e na que se inclúa información das axudas e dos proxectos e iniciativas que levan a cabo as dúas entidades.

Colaboración en investigación

Manuel Baltar e Salustiano Mato tamén acordaron que as dúas institucións colaborarán no desenvolvemento dun proxecto de investigación para analizar xuridicamente a explotación e aproveitamento das augas termais. Este proxecto deriva dun encargo realizado pola Deputación de Ourense a través do Consello Termal Ourensán e ten por obxecto analizar os procedementos xurídicos necesarios e os posibles problemas que se poidan suscitar na explotación e aproveitamento das augas termais para poder achegar solucións útiles e prácticas para as administracións públicas implicadas e para as empresas privadas que operan neste puxante sector económico. Este proxecto articúlase no marco do proxecto de especialización do campus de Ourense como Campus da Auga.

Tamén valoraron positivamente o desenvolvemento e os resultados do I Congreso Internacional da Auga, celebrado en setembro en Ourense, e acordaron propoñer unha colaboración estable entre Deputación, Concello de Ourense e Expourense para a celebración bianual en Ourense do Symposium Internacional de Termalismo e Calidade de Vida, cita académica e científica que celebrou este ano a súa primeira edición en paralelo ao I Congreso da Auga.