17 quilómetros para descubrir os tesouros da Serra do Xurés

A mestura de serras escarpadas con formas máis suaves, co granito como gran protagonista; os pequenos ríos que discorren entre rochedos e os bosques cheos de vida, son algúns dos atractivos que agocha a Serra do Xurés.
Situada no suroeste da provincia de Ourense, lindando con Portugal e integrada no Parque Natural da Baixa Limia, a Serrra do Xurés, será escenario este sábado dunha nova Ruta Cultural organizada polo Servizo de Deportes da Universidade de Vigo e na que tomarán parte un cento de persoas. “ Das oito rutas que existen na serra escollemos a máis longa, que vai de Cela ao Alto do Pisco completando un percorrido de 17 quilómetros”, explica José García-Calvo.
A ruta que inclúe unha visita á localidade Lobios no Parque Natural da Baixa Limia, clasificouse cunha dificultade media-alta “dado o desnivel que haberá que salvar, que vai dos 350 metros en A Cela aos 1000 do Alto do Pisco”, sinala García-Calvo. Entre os puntos de saída e chegada a ruta descorrerá por Alvite, Salgueiros e Gandaracha.

Gran participación

A ruta deste sábado na que participarán 100 persoas, será unha das máis concorridas do calendario, só superada, ata o de agora pola das Termas na que o número de camiñantes chegou aos 150. En canto ao perfil dos participantes, García Soto sinala que “ a gran maioría son universitarios, un 80% aproximadamente, xa que non esquezamos que por cada tres rutas concédeselles un crédito de libre configuración, ata un máximo de dous”. En canto ao 20% restante, son persoas alleas á Universidade que para tomar parte na ruta deben abonar 13 euros, 5 máis que no caso da comunidade universitaria.
Á ruta desta fin de semana seguiranlles ata completa o programa deste ano outros catro percorrido pola Ribeira Sacra o 28 de marzo, polos Canóns do Sil o 18 de abril, Montederramo o 25 de abril e o Incio o 9 de maio.

Proxecto de investigación CAMIÑOS

Nesta saída os participantes poderá participar do proxecto de investigación CAMIÑOS, dirixido polo profesor de socioloxía David Casado, orientado a pescudar o territorio como medio para camiñantes. A finalidade desta acción é documentar os aspectos maís salientables dun roteiro, para o que os camiñantes que o desexen terán que realizar tres fotografías o que lle pareza maís bonito, outras tres do que lles pareza máis feo e tres co que lle pareza máis típico. As fotografías tomadas ao longo do roterio estarán expostas na páxina web http://webs.uvigo.es/dcneira/xures a partir do 28 de marzo e ata finais de ano.

O Parque Natural da Baixa Limia-Serra do Xurés

Cunha superficie que se achega aos 21.000 metros cadrados, o parque natural esténdese polo sector extremo da subcomarca da Baixa Limia. Situado no suroeste da provincia de Ourense, o Parque Natural da Baixa Limia- Serra do Xurés, acolle boa parte das serras de Leboreiro, Quinxo, Santa Eufemia, Xurés e Pisco, superando todas elas os 1000 metros de altitude.
Asentado sobre granito, o parque ten unha gran variedade paisaxística que combina altitudes superiores aos 1500 metros e tramos do río Limia que discorre por baixo do 300 metros de altitude. A vexetación do parque alterna os bosques de árbores caducifolias, característicos de zonas húmidas, cos de folla perenne, máis adaptados á falla de auga durante determinadas épocas do ano.
O cabalo, o corzo, o raposo, o xabarín, a lontra, a aguia real, a bubela, a cobra de auga, ou a víbora fociñenta, son algunhas das especies que acolle o parque que conta tamén con numerosos restos megalíticos datados entre o 3500 e o 2000 a.C.