300 lingüistas de 50 universidades debaten en Vigo os últimos avances da disciplina

Atlas lingüísticos, tradutores automáticos, estudos sociolingüísticos sobre linguas minorizadas... son só algúns exemplos dos resultados que acadan no día a día do seu traballo os chamados “lingüistas aplicados”, expertos da lingua que teñen como tarefa principal dar pistas á sociedade sobre as múltiples utilidades prácticas que pode ter a sintaxe. Co obxectivo de pórse ao día sobre as últimas investigacións neste campo dende hoxe e ata o vindeiro sábado reúnense en Vigo máis de 300 expertos procedentes de 50 universidades españolas, europeas, americanas e asiáticas no XXVIII Congreso da Asociación Española de Lingüística Aplicada, AESLA.
Organizado polo grupo de investigación LVTC (Language Variation Textual Categorisation) do Departamento de Filoloxía Inglesa, Francesa e Alemá da Universidade, o congreso conta con 10 paneis temáticos no que se exporán traballos sobre tradución, ensinanza e aprendizaxe de linguas, psicolingüística, análise do discurso... “vaise facer un fondo repaso a todo o que se está a facer e para iso contamos coa participación de primeiras figuras mundiais neste campo”, salientou o profesor Javier Pérez Guerra, investigador do LVTC e coordinador do comité organizador.
Entre estas figuras que estes días van participar no congreso Pérez Guerra destacou a presenza en Vigo de Sylviane Granger, da Universidade Católica de Lovaina en Bélxica, que foi a encargada de impartir a conferencia inaugural. A ela o coordinador engadiu outros nomes: Ruslan Mitkov, “un número un da lingüística computacional” ou Pilar García Mayo, autora de numerosos estudos sobre adquisición de linguas en contextos bilingües e trilingües, “unha intervención especialmente interesante nun caso coma o galego no que o debate lingüístico está na rúa”, apuntou Pérez Guerra.

O inglés como ferramenta de traballo

Como lema do congreso elixiuse Analizar datos, describir variacións, unha frase coa que, a xuízo do coordinador, “se resume perfectamente o traballo que estamos a levar a cabo dende a Universidade”, indicou Guerra.
Na actualidade forman parte do grupo case vinte investigadores que estudan a lingua inglesa e a súa evolución. Nestes días exporán no congreso parte dos traballos que están a levar a cabo, tanto en temas de tradución automática coma de análise do discurso oral, o que inclúe dende análise de actas de xuízos do século XV para analizar o tipo de lingua que se empregaba na época ata o estudo dos actuais discursos políticos que empregan os candidatos á presidencia do goberno aos diferentes países anglosaxóns.

Un curso cunha “boa colleita” en humanidades

Na inauguración do congreso, á que tamén asistiu o presidente de AESLA, Francisco Ruíz de Mendoza, o reitor retou aos presentes a facer unha investigación que sexa moderna, tecnoloxicamente avanzada e socialmente compremetida, “algo que ata fai moi pouco lle estaba negado ás humanidades”, subliñou.
Alberto Gago aproveitou tamén a ocasión para destacar a boa colleita que as humanidades deixaron este curso para a Universidade, lembrando a celebración do Congreso Ibérico de Tradución, a Asemblea Xeral de Unión de Editoriais Universitarias Españolas e o Congreso Internacional de Literatura Comparada, ao que agora se engade o de AESLA. “Non é un mal balance para unha Universidade como a nosa que ten unha forte presenza dos ámbitos científico e tecnolóxico”, subliñou, ao que engadiu que “se pensamos nun desenvolvemento equilibrado da nosas institucións é importante que as linguas e as humanidades en xeral teñan unha tribuna de prestixio no sistema de ciencia e tecnoloxía”.