9000 euros para a organización de actividades docentes que promovan a perspectiva de xénero na UVigo

Conferencias, xornadas ou calquera tipo de actividade (obradoiros, seminarios, ligas de debate, exposicións, ciclos de cine, concursos, etc.) que implique un impacto positivo no alumnado cara á promoción de valores igualitarios, pode optar ás axudas para a organización de actividades docentes que promovan a perspectiva de xénero que a UVigo fixo públicas a través dunha resolución reitoral. As actividades propostas deberán estar vinculadas á practica docente e contemplar contidos que axuden a incorporar a transversalidade de xénero na formación do alumnado e que impulsen a transmisión de valores igualitarios para a adquisición das súas competencias profesionais e o seu desenvolvemento persoal.

Calquera membro do persoal docente e investigador (PDI) con docencia asignada no Plan de Ordenación Docente (POD) poderá concorrer á convocatoria, que se pechará o 16 de febreiro, e que só admitirá unha solicitude por persoa. 9000 euros é o importe máximo co que a Unidade de Igualdade fará fronte aos gastos orixinados polas actividades docentes subvencionadas, concretamente os gastos correspondentes á posta en marcha e desenvolvementos dos programas, como gastos de viaxe de conferenciantes, pago de conferencias, traslado de obras artísticas, aboamento de dereitos de exhibición ou calquera outro necesario paras desenvolver o programa concreto. Os gastos non poderán contemplar en ningún caso retribucións de persoal vinculado estatutariamente ou contractualmente á UVigo, gastos protocolarios, nin gastos de publicidade. En ningún caso, ningunha solicitude poderá acadar unha axuda superior a 2000 euros.

Os programas para os que se soliciten a axuda terán o 14 de novembro como data límite de realización.