Profesionais deste sector laboral falarán do seu día a día
Un achegamento ao mundo das consultoras en primeira persoa a través dun curso de verán
Ademais das sesións teóricas, o obradoiro conta cun período de prácticas en empresas
Calquera persoa que, nunha situación dada, aconsella outra, tendo como base un coñecemento previamente adquirido, está practicando consultoría. No ámbito empresarial, podemos definir o labor dun consultor como o do xerente dun proceso de educación que atende a unha necesidade específica doutra empresa. Este é, precisamente, o eixo que centra o curso de verán de Consultoría para a innovación e o emprendedorismo que se prolongará ata o venres.
É a primeira vez que o campus acolle un obradoiro sobre esta temática coa que, segundo a súa directora, Ana Gueimonde "trátase de achegar o mundo das consultoras ao alumnado, xa que considero que son un sector laboral en auxe, tanto como saída profesional, como para a creación dunha empresa”. As consultoras “son contratadas por outras organizacións para que lles deseñen e implanten sistemas de xestión vitais para estas e supoñen un sector que ocupa a un volume nada desprezable de persoas”. Ademais o curso ten como obxectivo dar a coñecer as metodoloxías, técnicas e capacidades que precisa unha persoa para desenvolverse laboralmente no campo da consultoría de empresas.
O éxito do curso está garantido, xa que conseguiu espertar o interese dos alumnos que rapidamente encheron o cota de inscrición, das 35 prazas dispoñibles de xeito que “cubrimos a matrícula por completo”, dixo Gueimonde.
Un primeiro achegamento global
O curso deu comezo da man de Gerardo Estévez, director de DPI Consultores e profesor na Universidade de Vigo, que ofreceu unha introdución xeral á materia. Nesta primeira sesión abordáronse “conceptos, métodos, ferramentas, competencias, perfil e rol dun consultor”, intentando debullar a materia pouco a pouco, “aínda que é moi difícil falar destes termos de consultoría ser atender especificamente a un proxecto”, explicou Estévez. Para finalizar a primeira xornada, Estévez presentou “a realidade dun plan director dunha empresa ourensá, para identificar que é o que pinta un consultor en todo isto”.Tras o paso de Estévez polo curso este martes a temática céntrase na consultoría institucional e en emprendedorismo por unha banda e a consultoría en coaching por outra. continuarán as sesións teóricas ata o mércores da man de consultores profesionais chegados de diferentes empresas. O mércores será o último día de sesións teóricas, o eixo desa xornada será a consultoría para a xestión da organización, a calidade, a innovación e os proxectos. “Deste xeito os alumnos coñecerán en primeira persoa os labores que se realizan nunha empresa consultora”, apuntou Gueimonde.