A ACSUG presenta as pautas para o seguimento dos títulos oficiais
Os responsables dos graos e masters coñeceron no novo programa de acreditación
Os decanos e decanas dos campus do Vigo e Pontevedra e os responsables dos seus graos e posgraos déronse cita este martes nunha unha xuntanza para coñecer polo miúdo o novo Programa de Seguimento do Títulos Oficiais. Da man da Axencia para a Calidade do Sistema Universitario de Galicia presentouse este programa que será a ferramenta básica para o seguimento e acreditación dos títulos oficiais das tres universidades galegas, un total de 298 entre graos e posgraos.
O director da ACSUG, Eduardo López, acompañado polo vicerreitor de Alumnado, Docencia e Calidade, Ignacio Barcia, explicoulles o proceso completo que debe seguir cada centro neste proceso que, para os graos e doutoramentos dura 6 anos e para os mestrados 4. A idea, explicou, “é calibrar o compromiso e os logros de calidade das nosas universidades” e engadiu que para elaborar este programa o pasado ano se puxo en marcha un proxecto piloto que avaliou nove titulacións das tres universidades, catro delas da Universidade de Vigo.
A importancia da información e da transparencia
Foi Paula Barrios, técnica da ACSUG a encarga de repasar os pasos que se deben seguir neste proceso de acreditación. Segundo explicou, deben pasar por este proceso os 120 graos e 178 posgraos das tres universidades para medir a súa calidade. No caso dos mestrados, o director da axencia explicou que aqueles que este ano non tivesen un mínimo de cinco matriculados non se poderán ofertar no vindeiro curso, mentres que os que tiveron entre 5 e 10 terán unha moratoria doutro ano.Barrios apuntou que os prazos do seguimento non están definitivamente pechados, pero si está decidido que cada centro debe facer un informe anual, ao igual que a ACSUG, mentres que intervención dunha comisión externa non ten delimitada a súa periodicidade. Estes tres informes serán as tres ferramentas para acadar a acreditación. Así, para os graos o proceso dura seis anos, transcorridos tres dos cales debe haber unha avaliación externa; para os mestrados o proceso dura catro anos, polo que a avaliación externa debe facer aos dous anos. En ambos casos, finalizado este proceso, os títulos obterían a renovación da acreditación que teñen neste momento de implantación.
Esta guía, que será presentada en Ourense o vindeiro día 31, segundo subliñou a técnica da ACSUG, persegue o propósito de transparencia e accesibilidade que debe presidir todas as titulacións e conta coa autorización do Ministerio de Educación. Segundo o que establece, o informe anual de seguimento que debe elaborar cada centro deben rexerse tres principios: a oferta de información pública sobre o título, o cumprimento coa implantación do proxecto elaborado para a titulación e a execución das accións necesarias de mellora que ano a ano se recollan no informe de seguimento anterior.
En definitiva, este programa tenta en palabras do director da ACSUG “facerlle máis sinxelo este proceso aos implicados nel, axudándoos a facer este seguimento e a facelo o menos custoso posible” e nel todos os implicados no proceso de calidade poden atopar ferramentas para o proceso de seguimento.