Os expertos internacionais máis relevantes en filoxenómica celebran hoxe un encontro en Vigo
Afondando nos misterios da árbore da vida
Organizado polo Grupo de Filoxenómica da Universidade, baixo a dirección de David Posada
Os científicos máis relevantes do panorama internacional danse cita hoxe en Vigo para compartir avances e perspectivas da filoxenómica, a disciplina que se encarga do estudo do xenoma desde unha perspectiva evolutiva. A Computional and Statistical Phylogenomics Meeting que durante toda a xornada se celebra no Centro Social Caixanova, é unha iniciativa do Grupo de Filoxenómica da Universidade de Vigo que dirixe o catedrático David Posada e que contou para a súa celebración con fondos do propio grupo procedentes dun proxecto de investigación do European Research Council (ERC) e cunha achega da International Biological Sciences (IUBS). “Neste encontro no que participa a flor e nata da investigación en filoxenómica computacional e estatística, tratamos sobre a reconstrución das relacións evolutivas entre xenes e organismos a partir de datos xenómicos e do uso destas relacións, que representamos a modo de árbore, para estimar parámetros poboacionais e contrastar hipóteses e modelos sobre a evolución das especies”, explica David Posada.
Procedentes na súa maior parte de EEUU, así como de Australia, Bélxica, Francia, Suecia, Canadá, Alemaña, Reino Unido e España, os científicos que participan no encontro, ademais de compartir os avances que se teñen rexistrado no ámbito da filoxenómica, abordarán as perspectivas cara á identificación de posibles solucións aos problemas que se formulan. “Problemas que pasan por como analizar cantidades inxentes de datos con rigorosidade matemática e estatística, mediante implementacións computacionais áxiles e contestando de xeito realista preguntas de interese biolóxico”, sinala Posada que incide na dificultade que entraña de compartir detalles conceptuais e técnicos, “salvo que sexa en persoa. E ese é o noso obxectivo fundamental: atoparnos para compartir ciencia”.
Presente saudable e futuro aínda máis interesante
As achegas procedentes de diferentes campos como bioloxía, informática, matemática e estatística, que continuamente producen novas ideas e desenvolven novos métodos de análise moi sofisticados, permite, segundo Posada, que a filoxenómica goce “dun presente moi saudable”. Pero se bo é o momento actual, “o futuro aínda resulta máis interesante”, afirma o catedrático da Universidade de Vigo, “debido á explosión de datos xenómicos á que asistimos que garante a necesidade de desenvolver novos métodos e técnicas de análise filoxenómica de xeito constante. E non nos esquezamos que cuestións básicas da árbore da vida, como a orixe dos animais, aínda non foron resoltas”, explica Posada.O catedrático da Universidade de Vigo, primeiro en acadar a Starting Grant da UE e autor de tres dos cinco artigos máis citados feitos en Galicia, dirixe o grupo de Filoxenómica que centra o seu traballo na estimación da historia das especies a través da historia dos diferentes xenes do xenoma mediante a aplicación de modelos matemático-estatísticos a datos reais.