Alumnado de Bacharelato redescobre no campus as matemáticas con Eduardo Sáenz de Cabezón    

Estudantes de 1º e 2º de Bacharelato dos IES Alexandre Bóveda, Carlos Casares e República Oriental do Uruguai de Vigo tiveron ocasión este mediodía de achegarse dun xeito diferente ao mundo das matemáticas a través da experiencia e o punto de vista do docente e divulgador científico Eduardo Sáenz de Cabezón. O presentador do programa de TVE Órbita Laika rememorou ante o alumnado dos IES como foi o seu achegamento ao mundo das matemáticas a través da informática, materia da que é docente, concretamente de Linguaxes e Sistemas Informáticos, na Universidad de La Rioja. O autor de El árbol de Emmy centrou boa parte do seu relatorio na protagonista do seu libro, a matemática Emmy Noether, “unha das persoas na que é mais evidente a distancia entre os logros científicos que acadou e o recoñecemento que obtivo”, dixo o divulgador. No seu libro, Sáenz de Cabezón pon en valor a figura dunha muller, xudía e matemática na Alemaña do primeiro terzo do século XX, a quen Albert Einstein consideraba un xenio e que, a pesar de continuar sendo unha descoñecida en moitos ámbitos, foi finalmente catalogada como unha das matemáticas máis importantes da historia e unha das científicas máis destacadas de todos os tempos. 

O relatorio do presentador de Órbita Laika foi organizado polos tres IES, cuxo alumnado se deu cita este mediodía no salón de actos da Facultade de Ciencias Económicas e Empresariais do campus de Vigo. A vicerreitora de Captación de Alumnado, Estudantes e Extensión Universitaria, Natalia Caparrini, foi a encargada de dar a benvida ás alumnas e alumnos de bacharelato nun 11 de febreiro no que se celebra o Día Internacional da Muller e a Nena na Ciencia e no que Caparrrini lamentou que só un 25% do alumnado das carreiras tecnolóxicas sexan mulleres, que dixo “poden chegar e conseguir todo o que queiran”.