Alumnado de catro países inicia en Pontevedra o curso de español para inmigrantes

Naturais de Marrocos, Brasil, Ucraína e Ghana, 14 persoas iniciaron este luns en Pontevedra a súa formación nun curso de español para persoas inmigrantes que busca preparalos para superar o exame DELE A2 do Instituto Cervantes e obter así un diploma que constitúe un requisito obrigatorio para que solicitar a nacionalidade española. Promovido pola Deputación Provincial e impartido por profesorado do Centro de Linguas da Universidade de Vigo, trátase do terceiro e último dos cursos gratuítos desenvolvidos no presente curso, na sétima edición dunha iniciativa que busca facilitar a persoas non hispanofalantes a obtención deste título e apoiar a súa integración na provincia.

A deputada de Cohesión Social en funcións, Olga García, e as profesoras do Centro de Linguas Ángeles Tomé e Cecilia Rodríguez, responsable de impartir este curso, participaron na mañá deste luns no edificio administrativo da Deputación na apertura desta actividade. Con 14 inscritos e inscritas, no curso participan seis persoas naturais do Brasil, dúas orixinarias de Marrocos, outras dúas procedentes de Ucraína e unha orixinaria de Ghana. 

Máis dun 90% de aprobados

Neste acto, Tomé Rosales lembrou ao alumnado a alta porcentaxe de éxito que está a ter este curso nas súas diferentes edicións, xa que máis do 90% das e dos participantes ata a data lograron superar o exame DELE (Diploma de Español de Lingua Estranxeira) de nivel A2, que é o requirido para solicitar a nacionalidade española. Dirixido a persoas maiores de 16 anos que se atopan en situación regular en España, empadroadas nun concello da provincia e que posúan coñecementos básicos de castelán, a metodoloxía desta actividade baséase no emprego de supostos prácticos, simulacros de exame e no desenvolvemento de destrezas e estratexias que permitan ao alumnado rendibilizar os seus coñecementos. De 40 horas de duración, esta actividade estenderase ata o 10 de xullo e súmase aos dous cursos impartidos en Vigo nas últimas semanas, nos que participaron 33 persoas. Rematada a súa formación, as e os participantes poderán presentarse ao exame do DELE A2 que o Instituto Cervantes levará a cabo en Vigo o 8 de setembro.