Alumnado de Ciencias da Educación amosa como soan Mozart, Bach ou Verdi co instrumentario escolar

O alumnado da especialidade musical da Facultade de Ciencias da Educación e do Deporte realizou onte o exame da materia Agrupacións Musicais II, impartida polo profesor Marco Lucato, nun concerto público ante a presenza de familiares, amigos e docentes. Presentaron obras de compositores clásicos con arranxos propios pensados para orquestra Orff, é dicir, a conformada co instrumentario escolar, e dirixidas por eles mesmos. A música de Mozart, Bach, Grieg, Verdi ou Beethoven serviu así para consolidar esta actividade, que sumou a súa XIV edición funcionando xa como un concerto tradicional de fin de curso.
Participaron en total 30 estudantes, que interpretaron 18 pezas en dúas partes. O carillón actuou como instrumento principal para a execución de partituras emblemáticas como o Bolero de Ravel, a Danza húngara de Brams, a 5ª Sinfonía de Beethoven ou a Nutcracker suite de Tchaikovsky, pois a temática deste ano foron os grandes temas clásicos. “Cada curso faise unha escolla diferente e, mentres noutras edicións foron bandas sonoras ou cancións infantís, nesta optouse polos grandes clásicos”, explica o profesor Ducato. Sinala tamén que lles permite aos seus alumnos e alumnas a posibilidade de examinarse neste concerto ou no exame oficial. “Realizan por parellas ou individualmente os arranxos e a dirección dunha peza, pois do que se trata é de avaliar a súa capacidade nestes eidos”, comenta.

Oportunidade de enfrontarse a un auditorio

Marco Ducato destaca que poden concorrer ás dúas convocatorias con igualdade de condicións. Con todo, valora a presenza neste concerto, “pois é unha oportunidade que teñen para aprender a manexarse en público, posto que serán futuros mestres e terán que enfrontarse a diario a un auditorio”. Así mesmo, mantén que esta actividade final serve para poñer en práctica os contidos de todo o curso e obrígaos a realizar ensaios completos. Os estudantes demostraron que esta metodoloxía funciona, que lles dá brío para atreverse con autores históricos e que acaban converténdose en músicos poliédricos, capaces de compoñer, tocar, cantar e dirixir.