O alumnado da Facultade de Ciencias da Educación e do Deporte fórmase en primeiros auxilios e emerxencias

Máis de 200 alumnos e alumnas dos Graos de Educación Infantil, Primaria e Ciencias da Actividade Física e do Deporte participaron este mércores nunhas sesións formativas en materia de primeiros auxilios e emerxencias. Organizadas polo grupo de investigación Remoss, especializado en rendemento e motricidade do salvamento e socorrismo, as III Xornadas de Formación Interdisciplinar celébranse esta semana no campus pontevedrés cun programa específico para o estudantado relacionado co deporte e con outro para o alumnado de educación infantil e primaria. Como explica Roberto Barcala, investigador principal do grupo e coordinador das xornadas, “é necesario formar ao alumnado, tanto do ámbito do deporte coma da educación, en materia de primeiros auxilios e emerxencias ao careceren deste tipo de formación nos seus plans de estudos”. Este proxecto pretende satisfacer a demanda de boa parte do alumnado da facultade de Ciencias da Educación e do Deporte achegando ata Pontevedra a especialistas de recoñecido prestixio nacional e internacional.

Un dos relatorios máis agardados era o do director médico de Sobrasa-Brasil, David Szpilman, que afondou no problema de seguridade que supoñen os afogamentos para as actividades deportivas e recreativas. A expectación ao redor desta conferencia aumentou significativamente logo de que se fixese público, esta fin de semana, o incidente dun alumno na facultade mentres xogaba un partido de fútbol. Despois disto, tal e como comenta Barcala, “a concienciación do alumnado foi, se cabe, aínda maior”. Un feito ao que se suma “a oportunidade de escoitar e debater con todos os conferenciantes, incluído Szpilman, o Messi do salvamento e o socorrismo”, subliñou.

Obradoiros e protocolos de seguridade

En sesión de mañá e tarde nas xornadas dirixidas específicamente ao alumnado de Actividade Física e do Deporte tamén participou o profesor da Facultade de Ciencias do Deporte e a Educación Física da Universidade da Coruña, José Palacios Aguilar; o coordinador do servizo de socorrismo de Santiago do Teide, Adolfo García Jiménez; o licenciado en Medicina e director da Policía, Bombeiros, Protección Civil e ambulancias do Concello de Bilbao, Andoni Oleagordia Aguirre; o coordinador do Servizo de Socorrismo do Concello de Vigo, Carlos Vales Porto; e o licenciado en Medicina e membro do Consello Español de Resucitación, Antonio Caballero Oliver. A maiores, a formación complementouse cunha serie de obradoiros nos que participaron, ademais dos alumnos e alumnas, algúns dos ponentes e o profesorado da Facultade de Ciencias da Educación e do Deporte.

Por outra banda, o alumnado dos graos en Educación Infantil e Educación Primaria tamén tivo o seu propio programa de actividades que empezou este onte, martes 23, e que rematará mañá xoves 25 de abril. No día de hoxe, os asistentes contaron coa presenza dos profesores da Universidade de Vigo Carlos Valcarcel Rivero e José Luis García Soidán e coas profesoras da Universidade de Santiago de Compostela Mercedes Novo Pérez e María Dolores Seijo Martínez. Dirixido tan só ao alumnado do Grao en Educación Primaria, pola tarde ten lugar un relatorio práctico no que se afonda, entre outros aspectos, na necesidade de ter unha formación básica en primeiros auxilios á hora de exercer a súa profesión.