O alumnado ponse en marcha na análise da situación económica actual

No contexto de crise económica mundial no que nos atopamos, son moitas as voces que se alzan co fin de aproximar posturas que axuden a mellorar a situación. Como futuros economistas preocupados polo porvir de España e de Galicia, o alumnado da Facultade de Ciencias Económicas e Empresariais organiza, con apoio do equipo docente e do decanato, o I Foro de Perspectivas Económicas.

Tras a aprobación de novas medidas de tipo económico dende o Goberno, a delegación de alumnos da facultade mostrou a súa inquedanza por coñecer e explicar a toda a comunidade universitaria, da man de profesionais do sector, cal é o escenario no que nos atopamos xa que, en palabras do coordinador das xornadas, Estevo Sánchez, “este é un foro con perspectiva de futuro. O pasado está moi estudado e o que queremos saber é a onde estamos indo coas medidas tomadas”.

Nesta primeira edición participarán, ademais de diversos profesores de diferentes universidades españolas, o subdirector xeral de Análise e Modelización do Ministerio de Economía e Facenda, Luís González Calbet; representantes dos tres partidos políticos con representación parlamentaria en Galicia, ademais do director executivo da galega R, Arturo Dopico. Como subliña Estevo Sánchez, “poder escoitar os poñentes que asistirán é un plus a nosa formación. Ter contacto con profesionais deste calibre é todo un luxo”.

Debates, mesas redondas e conferencias

As xornadas comezan o martes 12 de abril coa participación dos profesores da Universidade de Vigo Albino Prada e Eduardo L. Giménez na mesa de debate A economía española ante o futuro. A continuación terá lugar a conferencia do representante do ministerio, Luís González, baixo o título A situación da economía española: expectativas.

O sistema financeiro será o protagonista o mércores 13 de abril cunha mesa redonda a cargo dos docentes José A. Novo, da Universidade da Coruña José A. Novo e Xavier Vence da Universidade de Santiago de Compostela. Esta mesa redonda deixará paso o relatorio do director executivo da empresa R, Arturo Dopico, encargado de pechar o día.

Un dos pratos fortes do programa resérvase para o último día, o xoves 14 de abril. Neste día a xornada ábrese cunha mesa de debate na que participarán o docente da Universidade Jaime Aneiros en representación do PSdeG, o portavoz de Economía do BNG, Fernando Blanco, e un representante do PPdeG, aínda por determinar, que dende as súas respectivas posturas políticas achegarán criterios para acadar a saída de Galicia da crise.