Alumnado de Relacións Internacionais achégase ao panorama xeopolítico mundial

A Facultade de Relacións Internacionais do campus de Ourense acolleu este luns a conferencia Panorama xeopolítico 2024, ofrecida por Francisco Dacoba, director xeral do Instituto Español de Estudios Estratégicos. A actividade estivo organizada en colaboración coa Facultade de Historia e coordinada polo profesor de ambos centros Luis Velasco.

Tal e como puido coñecer o alumnado asistente, este Instituto Español de Estudios Estratégicos, encadrado organicamente no Centro Superior de Estudios de la Defensa Nacional, ten asignados dous labores fundamentais: "realizar as análises de carácter estratéxico necesarias para asesorar ás autoridades do Ministerio de Defensa en materias relativas á seguridade e á defensa e, complementariamente e como consecuencia do anterior, o de contribuír a manter informada á sociedade española de canto incumbe á preservación das súas liberdades, do seu benestar e, en última instancia, do seu estado de dereito". O relator amosou a súa satisfacción por ofrecer esta conferencia sobre xeopolítica ante alumnado universitario, neste caso especificamente de Relacións Internacionais.

Na súa conferencia, o ourensán Francisco Dacoba fixo “un repaso ao panorama internacional, aos papeis dos grandes actores da xeopolítica mundial e as repercusións que a competitividade, sobre todo entre as dúas grandes potencias, Estados Unidos e China, ten para o resto de actores da comunidade internacional, sexa a Unión Europea, e dentro dela España, ou sexa en calquera outro actor”. O experto analizou esas relacións e as tensións e conflictividades que esa competitividade xera. “O máis significativo é que nos atopamos que a orde multilateral que coñecíamos baseada en determinadas regras está sendo cuestionada por actores, fundamentalmente China, que teñen outro concepto das relacións internacionais e que obxectan un modelo que era netamente occidental, baseado nas Nacións Unidas, o Fondo Monetario, etc”. Así, lembrou, China propón “un mundo multipolar e iso xera unhas tensión moi fortes, de tipo económico, tecnolóxico e xeopolítico, que explican a conflitividade que hai en moitos escenarios, substanciadas nalgúns casos con guerras”.