Amnistía Internacional pide ás universidades galegas que potencien a educación en dereitos humanos

300 plans de estudo de trece países e territorios europeos revisou a organización Amnistía Internacional para elaborar un informe que demostra o escaso compromiso cos dereitos humanos na educación superior, tanto en España como nos países vecinos.
Las Universidades españolas, a la cola de Europa en formación obligatoria en derechos humanos, confirma que dentro do contexto europeo, España atópase no bloque de países que menos interese outorgan aos dereitos humanos na formación universitaria, fronte a Inglaterra, Portugal, Bélxica e Francia que son países que destacan por potenciar a presenza de materias obrigatorias de dereitos humanos.
O informe conclúe que máis dun millón de universitarios españois non teñen acceso a ningunha materia sobre dereitos humanos de carácter obrigatorio, xa que todas son optativas.
Ante esta situación Amnistía Internacional solicita ás autoridades universitarias que se comprometan a introducir polo menos unha materia obrigatoria de educación en dereitos humanos en todas as titulacións de Educación, así como nos graos de Xornalismo, Medicina, Traballo Social e Dereito.

O caso de Galicia

Amnistía Internacional remitirá o informe ás tres universidade galegas ao tempo de solicitará entrevistas cos responsables da reforma das titulacións de grao de xeito que “ as universidades galegas se poñan á cabeza de España en materia de educación en Dereitos Humanos”, sinala Guilermo Cid, responsable de Educación en Dereitos Humanos de AI en Galicia.
Para a organización o proceso de adaptación ao Espazo Europeo de Educación Superior é unha oportunidade histórica para que os universitarios que cursen Medicina, Ciencias da Educación, Dereito, Xornalismo e Traballo Social”, teñan unha formación específica nun tema clave como son os dereitos humanos.
Amnistía tamén insta ao goberno español a incluir a educación en dereitos humanos na formación e capacitación profesional do persoal docente, tal e como propón o Plan de Acción do Programa Mundial para a Educación en Dereitos Humanos aprobado pola Asemblea Xeral da ONU en 2004. “España ten a obriga de cumprir e facer cumprir as indicacións relativas á formación universitaria, e a súa reforma é unha excelente oportunidade para dar resposta aos compromisos asinados por sucesivos gobernos e que obrigan a introducir contidos de dereitos humanos no sistema universitario”, afirma Cid.