Ana Miranda comparte cos estudantes as aspiracións europeas do BNG

Máis votos, máis presenza, máis tempo para traballar polo país. Esas foron as premisas que Ana Miranda, candidata do BNG ás eleccións europeas esgrimiu para que o seu partido poida volver a ter representación en Bruxelas. Nunha campaña “ausente de debate” e con “tendencia á bipolarización”, Miranda agradeceu a invitación da Facultade de Ciencias Sociais e da Comunicación para o encontro cos estudantes e destacou que estes comicios “non importan menos que outros, porque todos elixen cousas diferentes”.
O primeiro obxectivo da nacionalista no seu coloquio foi rachar “a idea de que o BNG non vai ter representación no Parlamento, porque non é certo”. E é que, segundo explicou, o BNG, que acode a esta cita en coalición con Los Verdes-Alianza Europea (canda ERC, Aralar, Los Verdes, Eusko Alkartasuna, Chunta Aragonesista e Entesa per Mallorca), accederá a un reparto de forzas con representación dividida segundo o resultado de cada partido. Miranda comentou que o obxectivo do BNG é ofrecer “unha visión galega de Europa” con máis políticas sociais e máis relación coa mocidade. Neste punto sinalou o “bo nivel das universidades galegas” pero denunciou o feito de que moitos teñan que emigrar para traballar por “falta de tecido produtivo e cohesión social”. Ao mesmo tempo, gabou o programa Erasmus pero apostou por dotalo “de máis orzamento e unha visión máis ampla”.
Miranda, que foi responsable técnica da oficina do BNG no Parlamento Europeo e asistente parlamentar do eurodeputado nacionalista Camilo Nogueira, tamén ofreceu algunhas consideracións acerca da crise e da súa xestión desde Bruxelas. Destacou unha falla “de resposta europea común” e da existencia de dous tipos de medidas “un para sectores como a agricultura, o leite e a pesca, e outra para industrias como a automobilística ou o gasoil”. Fronte a isto, indicou que o seu partido exercerá unha “defensa global dos intereses de Galiza”.

Que pode facer un europarlamentario galego?

A pregunta está na mente de moitos e nela subxace o desapego de gran parte do electorado ante estas eleccións. Miranda non esquivou esta cuestión e sinalou que o grupo parlamentario no que se integra o BNG “ten a chave para moitas decisións que se toman no Parlamento”, do que non convén esquecer “que decide o orzamento e polo tanto, a xestión de fondos moi importantes para Galiza”. O “limbo” no que semella estar a Unión Europea, da que a xente no coñece a influenza que exerce nas súas vidas, está provocado, segundo a nacionalista, por “unha gran desinformación das autoridades ás que lles compete informar, como o Estado” e Miranda indicou que esta é a razón “de que o proxecto de Constitución europea non resulte próximo nin estimulante” para os cidadáns. “Foi máis ben un tratado férreo”, cando o que a Unión precisa é “unha Constitución verdadeira, froito do consenso e con valor social”, apuntou.

Antolín Sánchez Presedo pechará o ciclo

O vindeiro luns, día 1, ás 12.00 horas, o candidato do Partido Socialista, Antolín Sánchez Presedo reunirase cos estudantes da facultade e pechará deste xeito o ciclo de encontros cos candidatos galegos ás eleccións ao Parlamento europeo organizado pola Delegación de Alumnos e a Área de Ciencia Política e da Administración.