Ángel Carracedo desvela o segredo de como diagnosticar unha enfermidade antes de padecela

A incidencia do cancro de mama hereditario é algo máis alta en Galicia que no resto de España, pero grazas á xenómica esta anomalía non só está controlada, senón que permite diagnosticar a enfermidade incluso antes de padecela. Non é a única doenza na que esta avaliación temperá é clave, algo que o investigador Ángel Carracedo intentou plasmar onte nunha conferencia no auditorio do Centro Social Novacaixagalicia, ateigado dun público no que se atopaban profesionais da medicina, da farmacia e da enfermaría ou investigadores do CSIC, entre outros. Organizada pola revista Investigación e a Facultade de Bioloxía da Universidade de Vigo e baixo o título Xenómica: unha revolución en Medicina, Carracedo explicou os avances que se están dando nunha materia na que Galicia é punteira.

O estudo xenético das enfermidades está revolucionando o diagnóstico, xa que se pode facer unha predición, saber se unha persoa acabará padecendo doenzas importantes e así previlas ou tratalas a tempo. Carracedo asegura que nestes intres cada unha das especialidades da medicina clínica demanda análises de ADN e que pola Fundación de Medicina Xenómica do Sergas pasan cada ano 20.000 pacientes. Sen embargo, non é o único camiño: a xenética forense está gañando pulo e xa se pode identificar a un individuo a partir de mostras mínimas. Por iso, Carracedo foi chamado xunto co seu equipo para participar en casos famosos como a identificación das vítimas do tsunami so sudeste de Asia, o atentado do 11-M ou o crime de Alcásser.

Líder en produción científica internacional en medicina legal e forense

Carracedo, doutor en Medicina, é pioneiro na introdución de novas tecnoloxías para a identificación forense mediante a xenética molecular, técnicas que xa forman parte da rutina cotiá de laboratorios de todo o mundo. Co grupo de investigación que dirixe converteuse en líder da produción científica mundial na área de medicina legal e forense, segundo a axencia independente Thomson Reuters, e está abrindo novas vías para a identificación dos xenes do cancro de mama, colon e tiroides, así como na detección das bases moleculares de enfermidades raras, neurolóxicas, cardiovasculares ou psiquiátricas, como a morte súbita, a esquizofrenia, o alzheimer ou a depresión postparto.

Director do nodo principal do Centro Nacional de Genotipado e do Programa Diana da Fundación Barrié, nos últimos anos Carracedo centrouse na famacoxenética, área na que converteu a Galicia nun referente europeo na busca de fármacos máis eficaces, sen efectos secundarios e con menos gasto social mediante o perfil xenético do paciente. Xa a través do programa Diana patentou un chip de ADN que detecta nun día o cancro folicular de tiroides ou un método analítico que nunha soa análise de sangue permite saber se os enfermos cardiovasculares tomaron a súa medicación.

Con máis de 10 libros e 340 artigos publicados sobre medicina xenómica e xenética clínica, forense e de poboacións, o doutor Ángel Carracedo ten no seu haber os premios Galicia de Investigación; o Novoa Santos; a Medalla Galien, o galardón máis importante no eido da investigación farmacolóxica; a Medalla de Galicia; a Cruz ao Mérito Policial ou o Premio Rey Jaime I, concedido por vinte premios Nobel.