O programa inclúe 13 actividades diferentes e a proxección de 12 filmes en dous ciclos ata finais de
Artes escénicas adaptadas ao espazo, música e cinema na primavera da Casa das Campás
O vicerreitor, Jesús Hernández, destacou da escolla “a busca da intelixencia sensible nas pequenas c
A Casa das Campás abre unha nova quenda da súa habitual programación de primavera. Ao longo de abril e maio acollerá 13 actividades diferentes que abranguen conferencias, cursos, cinema, teatro, música e danza, co obxectivo de ampliar os usos do edificio e de achegar este espazo á comunidade universitaria e á sociedade en xeral.
O vicerreitor do campus, Jesús Hernández, e a directora da Área de Extensión Cultural e Estudantes do Campus de Pontevedra, Ana Belén Fernández Souto, destacaron hoxe na presentación da programación a nova edición da sección Interzonas, que inclúe os espectáculos Os Dildos de Chévere, Menos 1 de Pisando Ovos e Duques de Bergara Unplugged de Sergi Faustino, así como a actuación de Lloréns Barber, moi axeitada para o lugar pola súa música feita con campás.
“Buscar a intelixencia sensible nas pequenas cousas” é a base deste programa, segundo indicou o vicerreitor, que remarcou que “ao igual que nas anteriores edicións, foxe dos grandes eventos e traza un eixo polifórmico con diferentes disciplinas, sempre marxinais, pero moi centradas”. Pola súa parte, Ana Belén Fernández, salientou “a orientación máis lúdica e espectacular da programación de primavera fronte á formativa da de outono”.
Interzonas, as outras linguaxes das artes escénicas
A sección Interzonas busca adaptar a obra dos artistas ao espazo para ofrecer unha nova perspectiva do edificio. É unha chamada de atención sobre traballos moi persoais, que incorporan linguaxes novas e unha vontade de xogo co público.Os Dildos, que chegará ao campus o 23 de abril, é un fragmento da obra Testosterona e está pensado para representar en espazos non teatrais, porque non precisa de iluminación e grandes escenarios. De xeito semellante, Duques de Bergara Unplugged preséntase sen escenografía para que sexa o espectador quen constrúa coa súa propia imaxinación o contexto da historia.
Manteñen esa busca de proximidade co público a peza de danza contemporánea Menos 1, a música do compositor valencián Lloréns Barber e o son do clavecín de Anaí Lago. Esta última pechará a programación o 28 de maio cun concerto titulado Couperenianas.
12 proxeccións en dous ciclos de cine
O cinema volve ocupar un espazo fundamental na primavera das Campás con dous ciclos nos que se proxectarán 12 longametraxes. O primeiro, co título O final de historia e coordinado pola profesora Berta Paz, desenvolverase na EU de Fisioterapia e abordará aspectos relacionados coa saúde. Pretende xerar reflexións compartidas a partir dos argumentos con cinco persoas convidadas: a doutora da Universidade de Brighton Raija Kuisma, o director de Special Olympics Internacional David Evangelista, o actor Álex Angulo, o artista Vicente Blanco e a cantante Pilar Martínez Pilocha.O segundo ciclo, Do tormento ao éxtase, coordinado polo profesor Suso Novás, fai unha escolla dentro da corrente do Novo Cinema Alemán. Proxectaranse filmes de A. Kluge, Volker Schlöndorff, Werner Herzog e Win Wenders, entre outros directores.
O Seoane artista, moda, exposicións e cursos
Entre os días 20 e 21 de maio, a Casa das Campás acollerá o encontro dedicado a analizar o universo artístico e plástico de Luis Seoane, unha actividade complementaria do congreso internacional que se está a desenvolver estes días no Consello da Cultura Galega con motivo do centenario do nacemento do creador. Intervirán especialistas na súa obra como Alberto Ruiz de Samaniego, Miguel Fernández-Cid, Ángel Cerviño ou Antón Castro.Ademais, todos os xoves desde o 15 ata o 27 de maio haberá unha cita co sector da moda no ciclo organizado por Esdemga. O xornalista Abraham de Amézaga, a arquitecta Guadalume Piñeira, o creativo Gaspar Sobrino, o cineasta Oskar Tejedor e o estilista Óscar de la Visitación, achegaránlles aos asistentes distintas versións do sector do deseño téxtil e a moda.
Completan a programación a nova mostra da Sala X, Performance en 6 tempos de Elías Pérez, as Aulas Abertas de Danza a cargo da compañía Entremáns e os cursos de formación permanente Xeometría dinámica con Cabri Geometre e Deseño editorial: Introdución ao proceso de maquetación de publicacións.