A Conferencia de Reitores emite un comunicado no que rexeita a forma e o fondo do Real Decreto
O 'así non' dos reitores ás medidas urxentes de racionalización do gasto público no ámbito educativo
O Comité Permanente Ampliado da Conferencia de Reitores, CRUE, vén de facer público un comunicado no que expresa o seu rexeitamento tanto polo procedemento como polos argumentos defendidos polo Ministerio de Educación, Cultura e Deporte para xustificar as medidas incluídas no Real Decreto-Lei 14/2012 de 20 de abril de medidas urxentes de racionalización do gasto público no ámbito educativo. Sobre o citado decreto no que se regulan as taxas e prezos públicos dos estudos universitarios, a dedicación do profesorado e a xestión económica das universidades, o Comité Permanente Ampliado da CRUE, rexeita “de xeito rotundo o procedemento seguido polo Ministerio, no que medidas de vital importancia no funcionamento e xestión das universidades, incluídas no citado Real Decreto-lei, foron coñecidas a través dos medios de comunicación e da súa publicación no Boletín Oficial do Estado”.
O comunicado no que a CRUE traslada de “xeito claro e rotundo” que “así non imos a mellorar o noso sistema universitario”, rexeita “categoricamente os argumentos defendidos polo Ministerio que apuntan ao insuficiente traballo de profesores e estudantes para xustificar as medidas incluídas no Real Decreto-Lei”. Pola contra, o Comité Permanente Ampliado da CRUE, denuncia que “a preservación da excelencia académica e a paralela satisfacción do principio de igualdade de oportunidades non atopan enunciación explícita na citada norma”.
Vontade de colaboración co Ministerio
No seu manifesto a Conferencia de Reitores das Universidades Españolas, solicita ao ministro de Educación, José Ignacio Wert, a convocatoria urxente do Consello de Universidades e a inclusión na orde do día do estudo do Real Decreto- Lei, “ao obxecto de que as universidades poidan trasladar ao Ministerio as súas opinións sobre cuestións de tanta trascendencia para o sistema universitario”. Así mesmo o Comité Permanente Ampliado da CRUE reitera “unha vez máis” a súa vontade de colaborar no estudo das reformas necesarias que permitan que “o sistema universitario español manteña un desempeño comparable ao dos mellores sistemas universitarios do mundo”.O comunicado dos reitores das universidades españolas fíxose público en Murcia, onde a CRUE celebra este venres a súa asemblea xeral extraordinaria.
Comunicado del Comité Permanente Ampliado de la CRUE (112 Kb)