O auxe das novas tecnoloxías suscita o interese pola seguridade dos datos médicos e a intimidade dos pacientes

A protección dos historiais clínicos e dos datos persoais é algo de vital importancia na actualidade, xa que o coñecemento de esta información por terceiros pode ter efectos discriminatorios para o paciente.O auxe das novas tecnoloxías e Internet suscita un interese especial por parte dos cidadáns no tocante á seguridade dos datos médicos e a súa intimidade, por iso as Xornadas sobre historia clínica e protección de datos persoais, que comezan este xoves 6 de novembro na Facultade de Dereito, tratarán de dar resposta a través dos distintos relatorios ás dúbidas que se presentan neste terreo tan controvertido.
As directoras das xornadas, Ana Garriga e Susana Álvarez, ambas profesoras da Universidade de Vigo, filléronlle un oco na programación do curso ao polémico rexistro obrigatorio dos portadores de VIH. “Ten especial relevancia o estudo dos requisitos e límites que deben presidir a inclusión deses datos nun rexistro obrigatorio e as garantías de seguridade que ofertan”, comentou Álvarez. O obxectivo das xornadas é precisamente “achegarse á problemática da recompilación e arquivo dos datos sanitarios en xeral e, de xeito especial, dos portadores de VIH e pacientes con SIDA”, concretou Álvarez.
O curso, de carácter gratuíto, terá lugar ao longo do mes de novembro, os días 6, 7, 13, 27 e 28 no salón de graos da Facultade de Dereito, e está orientado a estudantes de dereito e traballo social, que recibirán un crédito de libre elección por asistir, e a profesionais relacionados con estes ámbitos.

Contido das xornadas

O primeiro día de curso, este xoves 6 de novembreo, comeza coas conferencias das propias organizadoras. Ana Garriga, encargada do relatorio inaugural ás 16.00 horas, falará sobre a protección de datos de carácter persoal no ámbito sanitario. A continuación, Susana Álvarez, falará da problemática específica dos datos xenéticos.
O venres 7 será a quenda dos problemas da ética médica na ficción televisiva e da encrucillada ético-legal actual da investigación biomédica.
Non será ata o xoves 13 cando se fale da responsabilidade da Administración en relación coa historia clínica e das medidas de seguridade nos ficheiros sanitarios.
A problemática da comunicación do dato médico relativo ao padecemento do SIDA e a discriminación no ámbito laboral polo padecemento desta enfermidade centrará os relatorios do xoves 27.
O tema principal das xornadas, a igualdade e o VIH e o rexistro obrigatorio dos portadores desta enfermidade, será o encargado de pechar o curso. Tras estes relatorios terá lugar o acto de clausura e a entrega de diplomas aos asistentes.

Estudo previo

Estas xornadas xurdiron coa idea de dar a coñecer os resultados do proxecto de investigación titulado O rexistro obrigatorio dos portadores do VIH: requisitos, límites e garantías que eviten a súa discriminación que foi concedido polo Ministerio de Educación e Ciencia á Universidade de Vigo.
Este estudo enmárcase dentro da necesaria protección dos dereitos fundamentais do suxeito fronte a utilización da súa información de carácter persoal en xeral, e en particular, fronte ao uso de datos especialmente protexidos, habida conta dos efectos negativos que pode ter para a persoa afectada o coñecemento de esa información.

No seguinte enlace pódese consultal a programación completa das xornadas