Beiras exalta as aportacións de Bóveda á historia política-económica de Galicia

Con motivo da celebración do 75º aniversario da aprobación, polos concellos galegos, do primeiro Estatuto de Autonomía de Galicia, comezaron as actividades da Cátedra Alexandre Bóveda cun relatorio inaugural a cargo de Xosé Manuel Beiras no Teatro Principal de Pontevedra. Na presentación da cátedra, que a Universidade de Vigo creou co obxectivo de difundir a figura do galeguista e darlle un pulo ás ciencias sociais en Galicia, Beiras falou da vida e obra de Bóveda exaltando a súas aportacións á historia política-económica galega. “Boveda non é simplemente o mito, non é tampouco só o símbolo... é un inmenso labor creativo sen protagonismos, é unha loita fecundadora, é unha mente cristalina e é unha visión anticipadora e premonitoria”, afirmou Xosé Manuel Beiras no seu relatorio Alexandre Bóveda ou Galicia como paixón e engadiu que “se alguén me preguntase o que foi a vida do galeguista, diría que foi a vivencia loitadora de Galicia como ensoñación, e se me preguntasen como foi a súa morte diría que foi a feroz inmolación de inocencia, vida e morte son en Bóveda a terra e mailo ceo”.
Pola súa banda, o reitor da Universidade de Vigo, Alberto Gago, presentou esta primeira actividade da cátedra e expresou que con ela “se pretenden difundir as ciencias socias en Galicia e, de xeito singular, o estudo da cuestión nacional. Se queremos personalizar dalgún modo estes obxectivos, Alexandre Bóveda e Xosé Manuel Beiras ocuparán sempre un lugar de honra”.
O ex voceiro nacional do BNG tamén incidiu no seu relatorio a necesidade desta cátedra impulsada pola Universidade de Vigo para "divulgar e servir de foro de discusión permanente da obra de Bóveda" quen, segundo Beiras "aínda que recoñecido e amado para un sector da cidadanía, segue a ser un gran descoñecido, como tamén o son as súas obras".
A Cátedra Alexandre Bóveda é unha iniciativa na que colaboran cinco institucións do ámbito público e privado, como a Consellería de Cultura e Deporte, o Concello de Pontevedra, Caixanova, a Fundación Alexandre Bóveda e a propia Universidade de Vigo. Representantes de todas elas estiveron presentes no acto e o alcalde de Pontevedra agradeceu a todos a súa participación e comentou que “con esta actividade queremos facer máis presente a figura de Bóveda, que é un dos símbolos da cidade, e do nacionalismo contemporáneo co que todos estamos en débeda”.
No acto tamén estiveron presentes a delegada provincial da Consellería de Cultura e Deporte, Mª Xesús López Escudeiro; o director xeral de Creación e Difusión Cultural, Luis Bará; o vicerreitor do campus de Pontevedra, Jesús Hernández, o vicerreitor de Relacións Institucionais, Iván Area; e o director da Cátedra Alexandre Bóveda, Álvaro López Mira.

Máis actividades dentro da cátedra

A Cátedra conta con tres grandes liñas de actuación arredor da figura de Alexandre Bóveda. A primeira delas consistiu na creación dun centro de documentación, que xa se puxo en marcha, e que está traballando na recompilación do legado do autor, para permitir e dar accesibilidade aos investigadores. Por outro lado, en 2008 convocarase a primeira edición do premio de investigación Alexandre Bóveda, cunha dotación económica de 20.000 euros para o traballo premiado. Contará cun xurado de recoñecido prestixio e os traballos, en lingua galega, poderán versar sobre ciencias sociais, económicas ou xurídicas. Finalmente, está prevista a celebración dunhas xornadas anuais dirixidas ao público en xeral. Probablemente se trate dun congreso sobre o galeguista, que previsiblemente abordará a parte fiscal e económica dos traballos de Alexandre Bóveda. Ademais, desde a Cátedra apoiarase o desenvolvemento de proxectos de investigación, de actividades como simposios, conferencias, seminarios ou cursos, colaborarase en proxectos culturais e favorecerase a mobilidade de estudantes e persoal docente.