Participa con 26 propostas artísticas de estudantes e docentes
Belas Artes revisa a proclama haitiana "todos somos negros" na 31 Bienal de Pontevedra
A facultade e a Casa das Campás acollen tamén coloquios e mesas redondas da Bienal
A 31 Bienal de Pontevedra convidou a estudantes e profesores da Facultade de Belas Artes e de Esdemga a presentar propostas de intervención artística a partir da convocatoria Todos somos negros, un proxecto colectivo e anónimo que impulsou a Red de Conceptualismos del Sur e que recolle a proclama da revolución independentista de Haití, retomado agora pola bienal, ao estar dedicada a Centroamérica e O Caribe. Finalmente seleccionouse un total de 26 proxectos de 45 docentes, alumnos e alumnas, que poderán verse no Edificio Sexto do Museo de Pontevedra desde o 4 de xuño ata o 12 de setembro.
Así mesmo, a facultade e a Casa das Campás acollerán actividades paralelas ás exposición, como conferencias, coloquios e mesas redondas; a profesora Paloma Cabello coordinará o Laboratorio de Mediación; e na Sala X montarase parte da exposición Tras-misións, coa presenza dos artistas Adán Vallecillo (Honduras), Guillermo Vargas e Priscilla Monge, os dous últimos de Costa Rica.
Todos somos negros
“Todos os cidadáns, de aquí en diante, serán coñecidos pola denominación xenérica de negros”, así reza o artigo 14 da Constitución haitiana de 1805, proclamada tras a revolución que levou á independencia do país, ata entón colonia francesa. En medio dos festexos previstos en torno ao bicentenario das revolucións independentistas americanas, retomar esa proclama e instalala na rúa e nos debates públicos é obxectivo dos traballos presentados na 31 Bienal polo equipo de Belas Artes e Esdemga. Fan isto, segundo di a convocatoria, non só para chamar a atención sobre a historia silenciada, senón tamén “pola carga disruptiva que aínda porta intacta a idea de que todos e todas poidamos definirnos como negros, nun ambiente de intolerancia crecente”.A presenza da Facultade de Belas Artes na 31 Bienal de Pontevedra enténdese como un espazo vivo no que se irán sucedendo diferentes propostas en varias quendas. “Artellamos o noso espazo como un work in progress continuo, no que unhas pezas se irán modificando e outras desaparecerán para dar paso a outras novas”, explica un dos coordinadores, o profesor Xosé Manuel Buxán. “Haberá un artista pintando in situ, outra peza que invita á xente a escribir frases sobre un mapa mundi ou outra tamén participativa na que se reparten cartas rosas co lema Bambi. Me encanta ser negrito”, comenta. Son obras de distintos formatos e técnicas, desde a pintura, a escultura, a fotografía e a videoproxección, ata a instalación, a performance ou a arte dixital.
Laboratorio de Mediación
A profesora Paloma Cabello coordinará o Laboratorio de Mediación da Bienal como parte da súa materia Transmisión, Mediación e Educación Artística. “Esta actividade é unha oportunidade para os alumnos, porque lles dá por primeira vez a posibilidade de deseñar recursos para mediar este a bienal e o resto da cidade e a xente”, explica. Esta proposta funcionará como un taller de arte, investigación e educación no que o alumnado presentará unha serie de proxectos, todos eles, segundo Cabello, “para achegar á xente á outra beira do charco”. A organización de almorzos, festas nas prazas, campañas publicitarias, obradoiros para nenos e o deseño dun álbum de cromos para coleccionar ao longo de todo o evento son algúns deses recursos.Belas Artes e a Casa das Campás, sedes do programa de actividades
A Facultade de Belas Artes será tamén unha das sedes do programa de actividades paralelo ás mostras, que comeza mañá cun coloquio dos artistas panameños Donna Conlon e Jonathan Harker, baixo o título Vídeos (e outros xogos). Completarán este ciclo de conferencias as intervencións da artista guatemalteca Rosina Cazali, dos cubanos Meira Marrero, José A. Toirac e Tania Bruguera e de Nancy Hoffman, co-directora do Instituto Buena Bista de Curazao.Pola súa parte, a Casa das Campás acollerá o ciclo de debates Subidos de tono, no que intervirán boa parte dos artistas presentes na bienal, para conversar sobre política e performance, ecoloxía, racismo, arte e delito e prácticas educativas.