Belas Artes, única representante española nun encontro internacional de artistas en Holanda

Unha semana para compartir experiencias e modos de traballo con artistas novos de diferentes puntos de Europa, pero tamén para comezar articular proxectos expositivos colectivos que logo se plasmarán nun calendario de exposicións. Iso foi o que supuxo para catro estudantes da Facultade de Belas Artes o encontro internacional Apprentice/Master, que ao longo da pasada semana se desenvolveu na localidade holandesa de Tillburg. Raquel Fernández, Ana Pérez Valdés, Diego Pazó e Brais Romero foron os catro alumnos seleccionados pola facultade para representalos neste evento promovido polo espazo Kunstpodium T, e no que Vigo foi a única universidade española representada no evento.

“Durante a nosa estadía visitamos varios centros de arte do país e déronse a coñecer os grupos de traballo”, relata Pérez Valdés, da que recoñece unha experiencia “interesante e inspiradora” e da que destaca tanto a posibilidade de participar nunha exposición colectiva en Holanda o vindeiro ano, como a de compartir “experiencias, ideas e outras formas de entender a arte” con graduados e graduadas de diferentes países. “A cultura de cada un, a súa contorna e historia, intervén sempre na túa obra e na túa maneira de traballar”, engade esta estudante de doutoramento que, nese senso, recoñece que esta iniciativa “pode abrir outras vías de traballo e novas posibilidades”, así como “lecturas que nunca pensaras” do propio proxecto artístico, que as e os participantes debían presentar nestas xornadas.

“É unha boa oportunidade para coñecer de primeira man o tipo de arte que se está a facer noutros países e poñer en valor os nosos proxectos persoais nun contexto distinto, xunto a persoas coas que compartimos intereses semellantes”, engade Fernández Barreiro, alumna do máster en Arte Contemporánea. Creación e Investigación, do que define como unha “experiencia moi enriquecedora, tanto a nivel persoal como profesional”. Nese senso, ademais de compartir experiencias co resto de participantes e articular os diferentes grupos de traballo, a chamada kick-off week do Apprentice/Master serviu tamén ás e aos participantes para visitar diferentes museos e centros vencellados á arte, como á Academia Jan van Eyck, en Maastrich.

Unha oportunidade de internacionalización

“É o único proxecto que temos de internacionalización na nosa facultade, a única oportunidade que teñen de entrar en contacto co mundo profesional a nivel artístico en Europa”, salienta o vicedecano Carlos Tejo dunha iniciativa á que Belas Artes se sumou por terceira vez e para a que contou coa colaboración da Vicerreitoría do campus. O responsable de Relacións Internacionais da facultade salienta nese senso que o Apprentice/Master, o pasado curso, constitúe unha plataforma “moi importante para a facultade á hora de establecer vínculos con Europa”. De aí que o pasado curso realizase un proceso de selección entre o seu alumnado das e dos que serían os representantes da Universidade neste encontro internacional, “xente moi cualificada, cunha obra consolidada e ben traballada”.

A oportunidade de expor noutro país

O encontro da pasada semana serviu tamén para definir os 12 grupos de estudantes que traballarán nunha serie de exposicións colectivas que se van desenvolver ao longo do próximo ano en diferentes espazos de Holanda, baixo a coordinación dun ‘master artist’, un ou unha artista cunha traxectoria consolidada que exercerá o labor de comisariado. “As ideas e o debate que xurdirán nestes grupos pode ser moi produtivas e enriquecedoras, achegando resultados positivos e rematando cuns proxectos atractivos”, salienta Fernández Barreiro, quen destaca a exposición que realizará baixo a coordinación de Gam Bodenhausen como o “mellor punto e final posible para esta aventura”. Nesa mesma liña, Pérez Valdés, que comparte proxecto con Brais Romero, baixo a coordianción de Danielle Lemaire, salienta que “a nivel curricular, unha exposición internacional sempre é un grande empurrón”, así como a posibilidade que dos contactos realizados nestes días, poidan derivar “noutros proxectos conxuntos no futuro”.