A Biblioteca Universitaria inicia o horario especial de aperturas

Co obxectivo de facilitarlle ao alumnado as tarefas de preparación dos exames de decembro-xaneiro, a Biblioteca Universitaria volve pór en marcha o seu horario especial de aperturas, que inclúe noites e festivos. O novo horario arrancará este sábado 25 de novembro e prolongarase ata o vindeiro día 18 de xaneiro, coincidindo co final do primeiro cuadrimestre.

Co novo horario as bibliotecas centrais dos campus de Ourense, Pontevedra e Vigo comezarán, desde este mesmo sábado, a abrir as súas portas todas as fins de semana e festivos, en horario de 08.00 h a 22.00 h nos casos de Torrecedeira, Pontevedra e Ourense, e de 08.00 h a 21.00 h no caso da central de Vigo. Ademais, dende o luns 27 de novembro e ata o xoves 21 de decembro (agás os festivos do 6 e odu 8 de decembro) e do luns 8 de xaneiro ao xoves 18 de xaneiro as bibliotecas de Torrecedeira e centrais de Ourense e Pontevedra manteranse abertas de luns a venres ata as 03.00 h da madrugada.

O primeiro cuadrimestre, que arrancou o pasado 4 de setembro, rematará o vindeiro 19 de xaneiro, interrompéndose a docencia desde o venres 22 de decembro ata o 5 de xaneiro, ambos incluídos, pola celebración do Nadal. O período de entrega de actas de grao estenderase ata o 2 de febreiro, mentres que no caso dos traballos de fin de grao e mestrado a data límite será o 23 de febreiro.

Para máis información sobre horarios e centros pódese consultar a web da Biblioteca.