Bibliotecas de portas abertas para preparar os exames

Os horarios xa non servirán de escusa para deixar de fincar os cóbados. Co gallo dos exames de xaneiro, a Biblioteca Universitaria comeza hoxe o seus horarios especiais de apertura para noites e fins de semana, tanto nas centrais dos tres campus como nas instalacións de Torrecedeira. Deste xeito, desde hoxe e ata o vindeiro 26 de xaneiro, as bibliotecas centrais dos campus de Pontevedra e Ourense e a de Torrecedeira permanecerán abertas ao público de xeito ininterrompido ata as 03.00 horas.

Durante as fins de semana, o alumnado poderá achegarse ata as bibliotecas da Universidade de Vigo de 08.00 a 22.00 horas ininterrompidamente, agás na Biblioteca Central do Campus de Vigo, que abrirá as súas portas a partir das 09.00 horas. Unha ampliación de horarios coa que a Biblioteca trata de “dar resposta na medida das nosas posibilidades e límites orzamentarios a unha demanda que se acentúa nesta época do ano”, explicou Paz Canduela, subdirectora da Biblioteca Universitaria.

Coa implantación do Plan Boloña, este ano os responsables da Biblioteca Universitaria están “á expectativa” para ver a evolución da demanda do estudantado. “Notamos unha baixada de usuarios porque co novo plan de estudos a convocatoria de decembro xa é residual. Agora temos que ver como é o comportamento do alumnado para os exames de xaneiro, xa que nalgunhas materias manteñen as probas pero noutras optan pola avaliación continua. Temos que adaptarnos aos novos tempos”, recorda Canduela.

Aumento de persoal

Para poder manter abertas as catro bibliotecas da Universidade de Vigo durante estas dúas semanas o servizo tivo que ampliar o persoal e contratar a 12 traballadores máis para a quendas de fin de semana, ademais de ampliar o servizo de limpeza. Despois de que a convocatoria de ‘fin de carreira’ abrira boca o pasado mes de decembro, as probas de avaliación deste primeiro cuadrimestre para grao e posgrao celebraranse entre 12 e o 27 de xaneiro, ambos incluídos.