Búscase alumnado de primeiro curso que queira mellorar a súa saúde

Cinco universidades españolas buscan, entre os seus matriculados de primeiro curso, estudantes interesados en formar parte do Proxecto uniHcos, centrado en analizar os hábitos de vida da poboación universitaria. O grupo de investigación Healthyfit, da Facultade de Ciencias da Educación e do Deporte do campus e dirixido polo profesor José María Cancela, participa activamente neste estudo coordinado dende a Universidad de León que conta co apoio e financiamento do Ministerio de Sanidade, Servizos Sociais e Igualdade. O proxecto atópase na fase inicial de selección da mostra “buscando que sexa o máis grande e representativa posible dado o interese e o alcance da investigación”, explica o profesor Cancela.

As universidades de León, Vigo, Cantabria, Granada e Xaén decidiron unir esforzos para deseñar e desenvolver un estudo lonxitudinal e nacional que dea conta da evolución das condutas relacionadas coa saúde en estudantes universitarios de primeira matrícula do curso 2011/2012. Como apunta Cancela, “o noso obxectivo non é que contesten de forma illada a un cuestionario, senón que queremos facerlle un seguimento da mostra durante 15 ou 20 anos creando case un vínculo familiar coa persoa”, de aí a necesidade de atopar alumnado “verdadeiramente” interesado en mellorar e mudar condutas pouco saudables. Membros do grupo de traballo deste estudo decidiron centrarse na etapa universitaria xa que moitos dos hábitos que inflúen na saúde consolídanse nesa idade “polo que é un momento adecuado para avaliar os estilos de vida e, se é necesario, tentar cambialos”.

O alumno que participe en Unihcos comprometerase a realizar enquisas online bienais dende o primeiro ano universitario, respondendo a unha lista de preguntas relacionadas co exercicio físico, hábitos alimenticios e co consumo de tabaco, alcol e drogas. Trátase dun estudo pioneiro en España “posto que actualmente non hai ningunha mostra universitaria establecida que ademais empregue as novas tecnoloxías para transmitir información e realizar as enquisas”, engade.

Similitude na liña de investigación

A Universidad de León solicitou a colaboración do grupo que lidera o profesor Cancela dada a súa afinidade coa liña investigadora do proxecto uniHcos. “Grazas á Cátedra Filgueira Valverde, hai un par de anos desenvolvemos un estudo sobre os hábitos de vida do alumnado do campus e xa nos sorprenderon datos curiosos que queremos reformular ou refutar con esta nova investigación”, sinala Cancela, que salienta ademais a idoneidade do proxecto “xa que neste contexto de crise, todo o que sexa economizar esforzos e buscar colaboracións é benvido”. Aínda que uniHcos naceu da man de cinco universidades, está aberto á participación de outras que teñan interese en participar “para conseguir unha mostra o máis representativa posible da poboación española”, apunta o profesor. Recentemente, adheriuse ao proxecto a Universidad de Las Palmas e hai previsión de que se una algunha máis.

Como ser uniHco

Para facerse uniHco, o alumno debe escribir ao correo electrónico unihcos@gmail.com a través do que se lle informará máis polo miúdo da investigación. Tras aceptar as condicións, remitiráselle a un sistema de enquisas que recolle e almacena os datos de forma totalmente confidencial e anónima.